Memleket basshysy Qasym-Jomart Toqaevtyń atyna Almaty qalasy mańaiynda ushaq apaty saldarynan bolǵan qaiǵyly oqiǵaǵa bailanysty birqatar shet memleketterdiń basshylarynan kóńil aitý jedelhattary kelip tústi, dep habarlaidy Aqordanyń baspasóz qyzmeti.
Resei Federatsiiasynyń Prezidenti Vladimir Pýtin ushaq apaty saldarynan bolǵan qaiǵyly oqiǵaǵa qatysty kóńil aitty.
«Resei halqy óz týystary men jaqyndarynan airylǵan adamdardyń qaiǵylaryna ortaqtasady jáne zardap shekkenderdiń tezirek saýyǵyp ketýine tilektestik bildiredi», – delingen jedelhatta.
Túrkiia Respýblikasynyń Prezidenti Rejep Taiip Erdoǵan Qazaqstanda áýe kemesiniń apatqa ushyraýy saldarynan adamdardyń qaza bolǵany jáne zardap shekkeni týraly habardy zor kúizelispen qabyldaǵanyn jetkizgen.
«Túrik halqynyń jáne jeke ózimniń atymnan dostas ári baýyrlas Qazaqstan halqynyń qaiǵysyna ortaq ekenimizdi bildire otyryp, osy oqiǵa saldarynan qaza bolǵan azamattardyń jaqyndaryna kóńil aitamyn. Zardap shekkenderdiń tezirek saýyǵyp ketýine tilektestik bildiremin», – dep atap ótken Túrkiia Prezidenti óz jedelhatynda.
Rim Papasy Frantsisk te Qazaqstanda jolaýshylar ushaǵynyń apatqa ushyraýyna bailanysty kóńil aitty.
«Jaqynda Almatyda bolǵan ushaq apaty týraly bilgennen keiin, Asa Qasietti Papa Frantsisk osy qaiǵyly jaǵdaidyń saldarynan zardap shekkenderdiń barlyǵyna kóńil aitady. Ol qaza bolǵandardyń rýhtarynyń máńgilik tynyshtyq tabýy jáne zardap shekkenderdiń jazylyp ketýi úshin duǵa etedi. Asa Qasietti Papa Qudireti kúshti Qudaidan barlyq adamdar úshin, ásirese qutqarý, qalpyna keltirý jumystaryna qatysatyn adamdarǵa kúsh-qýat berýdi jáne beibitshilik syilaýdy suraidy» - delingen Vatikannan kelip túsken jedelhatta.
Ózbekstan Respýblikasynyń Prezidenti Shavkat Mirziioev ushaq apaty týraly habardy zor kúizelispen qabyldaǵanyn jetkizdi.
«Qaza bolǵan adamdardyń jaqyndary men týystarynyń qaiǵylaryna ortaq ekenimdi jáne olarǵa meniń júrekjardy sózderimdi jetkizýińizdi suraimyn, sondai-aq, zardap shekkenderdiń tezirek saýyǵyp ketýine tilektestik bildiremin», – dep jazǵan Ózbekstan Prezidenti.
Memleket basshysynyń jáne Qazaqstan halqynyń atyna ózderiniń kóńil aitý jedelhattaryn Qyrǵyz Respýblikasynyń Prezidenti Sooronbai Jeenbekov, Tájikstan Respýblikasynyń Prezidenti Emomali Rahmon, Túrkmenstan Prezidenti Gýrbangýly Berdymuhamedov, Ázerbaijan Respýblikasynyń Prezidenti Ilham Áliev, Belarýs Respýblikasynyń Prezidenti Aleksandr Lýkashenko, Ýkraina Prezidenti Vladimir Zelenskii, Grýziia Prezidenti Salome Zýrabishvili, Finliandiia Prezidenti Saýli Niinistio, Shveitsariia Konfederatsiiasynyń Prezidenti Ýli Maýrer, Polsha Respýblikasynyń Prezidenti Andjei Dýda, Serbiia Prezidenti Aleksandr Výchich jáne Slovakiia Prezidenti Zýzana Chapýtova joldaǵan.
