Memleket basshysy Qasym-Jomart Toqaevtyń atyna birqatar memlekettiń basshylarynan jáne halyqaralyq uiymdardyń jetekshilerinen Jańa jylmen quttyqtaǵan jedelhattar kelip túsýde, dep habarlaidy Aqorda.
Resei Federatsiiasynyń Prezidenti Vladimir Pýtin óziniń jańa jyldyq quttyqtaýynda 2019 jyldyń Qazaqstan úshin aitýly oqiǵalarǵa toly bolǵanyn, sonyń ishinde, biliktiń Konstitýtsiiaǵa sáikes aýysqanyn jáne Memleket basshysynyń sailaýdaǵy aiqyn jeńisin atap ótken.
«Bizge Resei men Qazaqstan arasyndaǵy qalyptasqan qarym-qatynastardyń áleýetin tolyqtai saqtap qalǵanymyz ǵana emes, sondai-aq, strategiialyq seriktestikti, odaqtastyqty jáne tatý kórshilikti nyǵaitý úshin birlesken jumystardy jalǵastyrý mańyzdy. Oǵan Máskeý men Nur-Sultannyń Eýraziialyq ekonomikalyq odaq, Ujymdyq qaýipsizdik shart uiymy, Shanhai yntymaqtastyq uiymy jáne basqa da kópjaqty qurylymdar aiasyndaǵy kúsh-jigeriniń úilesim tabýy tyń serpin berdi. Kele jatqan jańa jylda memleketterimiz arasyndaǵy yqpaldastyq qaryshtap damitynyna senimdimin», – delingen Resei kóshbasshysynyń quttyqtaý hatynda.
Qyrǵyz Respýblikasynyń Prezidenti Sooronbai Jeenbekov kele jatqan jańa 2020 jylmen quttyqtaǵan jedelhatynda Qazaqstan halqyna beibitshilik jáne baq-bereke tilep, óziniń shynaiy lebizin bildirdi.
«Jańa jylda bizdiń birlesken kúsh-jigerimiz ekijaqty strategiialyq seriktestikti jáne baýyrlas qyrǵyz-qazaq halyqtarynyń igiligi jolyndaǵy odaqtastyq bailanystardy odan ári damytýǵa yqpal etedi dep senemin», – delingen Sooronbai Jeenbekovtiń jedelhatynda.
Koreia Respýblikasynyń Prezidenti Mýn Chje In men Birinshi hanym Kim Chjong Sýk korei halqynyń atynan Qasym-Jomart Toqaevty kele jatqan Jańa jylmen quttyqtady.
«Korei túbeginde beibitshilik ornatý isine kórsetken qoldaýlaryńyz ben yntymaqtastyqtaryńyz halqymyzdyń bolashaqqa degen seniminiń qainar kózi sanalady. Koreia halyqaralyq qoǵamdastyqpen birlesip, inkliýzivti jáne turaqty álem qalyptastyrý isin jalǵastyra beredi», – delingen jedelhatta.
Sonymen qatar, Memleket basshysynyń atyna óz quttyqtaýlaryn Ázerbaijan Respýblikasynyń Prezidenti Ilham Áliev, Aýǵanstan Prezidenti Muhammad Ashraf Ǵani men Birinshi hanym Rýla Ǵani, Litva Prezidenti Gitanas Naýseda men Birinshi hanym Diana Naýsedene, Singapýrdiń Premer-Ministri Li Sian Lýn men onyń jubaiy, Kanadanyń General-gýbernatory Jiýli Paiet, Resei Federatsiiasy Federaldyq jinalysy Federatsiia keńesiniń tóraiymy Valentina Matvienko, Dúniejúzilik saýda uiymynyń Bas direktory Roberto Azevedo joldady.
