Aqmoladan Jambyl oblysyna bir úiir jylqyny urlap áketken barymtashylar toby ustaldy, dep habarlaidy QazAqparat.
Aqmola oblystyq PD baspasóz qyzmetiniń málimetinshe, maýsymnyń 10-da jedel-izdestirý is-sharasy barysynda Baisary aýylynyń turǵyndaryna tiesili 36 bas jylqy urlaǵan kúdiktiler ustalǵan.
Urlyqtan mal ielerine kelgen shyǵyn - 17 million 750 myń teńgege baǵalandy.
«Qylmystyq toptyń quramynda 31-36 jas aralyǵyndaǵy Jambyl oblysynyń turǵyndary jáne shetel azamattary bar. Kúdiktilerdiń bári ýaqytsha izoliatorǵa qamaldy. Anyqtalǵandai, barymtashylar jaiylymda júrgen 36 bas jylqyny júk gazeli men tirkemesi bar «Scania» jabyq júk kóligine artyp Jambyl oblysynyń Baizaq aýdanyna alyp ketken. Keiin kúdiktiler jylqylardy jergilikti «ASA-ER» bazarynda satqan», - dedi vedomstvodan.
Qazirgi kezde Qylmystyq kodekstiń 188-1-babynyń 4-bóligi boiynsha sotqa deiingi tergeý amaldary qolǵa alyndy.
