23 qyrkúiekte Qazaqstanda 2 537 adamnyń analizinen koronavirýs anyqtaldy. Beisenbi kúni 3673 adam koronavirýstan jazylǵan. Densaýlyq saqtaý ministrliginiń jumadaǵy tańerteńgi habarlamasynda osyndai málimet usyndy.
Qazaqstanda koronavirýstyń beti qaitsa da, beisenbi kúni Almaty qalasynda (547), Qaraǵandy oblysynda (340), Almaty oblysynda (270) júzdegen naýqas tirkelgen. Pavlodar oblysynda - 190, Nur-Sultanda – 181, Aqtóbe oblysynda – 137, Aqmola oblysynda – 128, Shymkentte – 122, Shyǵys Qazaqstan oblysynda – 118, Qostanai oblysynda – 104 adamnyń PTR testi oń shyqqan. Qalǵan oblystarda ondaǵan naýqas anyqtalǵan.
Indet bastalǵaly beri 872 myń adamnyń PTR testi oń shyqqan. 10 953-i qaitys bolǵan. 22 qyrkúiekte 40 adam kóz jumdy.
Qazaqstanda pnevmoniianyń koronavirýsqa uqsas túrine shaldyqqandar 2020 jyldyń 1 tamyzynan beri esepke alynyp keledi. Byltyr Qazaqstanda jazda jii kezdespeitin ókpeniń qabynýy órshigen kezde DDSU "ólim qaýpi joǵary qazaqstandyq pnevmoniia" – durys anyqtalmaǵan Covid dep málimdegen.
2020 jyldyń tamyzynan beri elde 74,8 myń koronavirýs pnevmoniiasyna shaldyqqan. 61 myńy jazylǵan. 4776 adam qaitys bolǵan. 22 qyrkúiekte 7 adam sodan kóz jumǵan. 212 adamǵa koronavirýs pnevmoniiasy diagnozy qoiylǵan.
Qazir 65 myń adam koronavirýstan emdelip jatyr. 11 myńy statsionarda jatyr. 905 adamnyń jaǵdaiy aýyr, 241 adamnyń jaǵdaiy tym aýyr. 106 naýqas jasandy tynys apparatyna qosylǵan. Aýrýhanalardaǵy oryndardyń 33 paiyzy bos emes.
Koronavirýsqa qarsy vaktsinanyń tolyq dozasyn alǵandar 6,3 mln adamǵa jetti. 1,1 mln adam ekinshi dozasyn kútip júr.
Indet bastalǵaly beri álemde koronavirýs juqtyrǵandar 230 mln adamǵa jetti. 4,7 mln adam qaitys boldy.
