Qazaqstanda bir kúnde 110 adam koronavirýs pen pnevmoniiadan qaitys boldy. Bul - indet bastalǵaly beri tirkelgen eń joǵary kórsetkish.
Koronavirýspen bailanysty adam ólimi boiynsha eki kún burynǵy derekti jariialaityn densaýlyq saqtaý ministrligi seisenbi kúni "25 shildede 86 adam – koronavirýstan, 24 adam koronavirýs pnevmoniiasynan qaitys boldy" dep habarlady.
26 shildede Qazaqstanda 6797 adamnyń koronavirýs testi oń shyqqan. Bul da rekordtyq kórsetkish. 25 shildede 23 adamǵa koronavirýs pnevmoniiasy diagnozy qoiylǵan.
Barlyq aimaqta virýs kúsheidi. Dúisenbi kúni Nur-Sultanda - 1537, Almatyda - 1207, Qaraǵandy oblysynda – 796 naýqas tirkelgen. Qalǵan oblystar men qalalarda bir kúnde anyqtalǵan naýqastar 500-ge jetpeidi. Koronavirýs boiynsha "sary aimaqta" Túrkistan oblysy ǵana qaldy. Qalǵany – "qyzyl aimaqta".
27 shildedegi málimet boiynsha, 87 094 adam koronavirýs infektsiiasynan (–85 163 + jáne 1931 KVI-) emdelip jatyr. Olardyń ishinde 24 328 patsient statsionarda, 62 766 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1461 adamnyń jaǵdaiy aýyr,
• 306 patsienttiń jaǵdaiy óte aýyr,
• 182 naýqas ÓJJ apparatynda jatyr.
Indet bastalǵaly beri 542 myńnan astam adamnyń koronavirýs testi oń shyqqan. Budan bólek, PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 59 myńnan astam adam shaldyqqan.
2020 jyldyń naýryz aiynan beri 5538 adam koronavirýstan qaitys boldy dep aitylady. Tamyz aiynan beri koronavirýs pnevmoniiasy 3649 adamnyń ólimine sebep bolǵan.
Kei sarapshylar koronavirýs boiynsha resmi málimet tym tómendetilgen, shyn máninde virýs juqtyrǵandar men odan qaitys bolǵandar áldeqaida kóp dep sanaidy.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5,2 millionǵa jýyq adam vaktsinanyń birinshi dozasyn alǵan. Ekpeniń tolyq dozasyn alǵandar 3,3 millionnan asty.
