QR Energetika ministri Bolat Aqsholaqov Senat qabyrǵasynda ótken dóńgelek ústelde bir AES-ti ustaýǵa neshe maman qajet ekenin aitty dep habarlaidy QazAqparat.
«Eldiń energetikalyq teńgeriminde jańa generatsiia núktesi retinde qýaty 2,4 GVt bolatyn atom elektr stansasyn salý qarastyrylyp otyr», - degen ministr Qazaqstanda AES salýdyń artyqshylyqtary men álemdegi atom energetikasynyń naryǵy týraly málimetterge toqtaldy.
«Atom energetikasynyń tarihy jarty ǵasyrdan astam ýaqytty qamtidy. Osy ýaqyt ishinde ol energetikanyń dástúrli salalarynyń birine ainaldy. Qazir álemdegi 31 el atom elektr stantsiialaryn paidalanady. Osy jyldyń aqpan aiyndaǵy jaǵdai boiynsha álemde shamamen 439 energiia reaktory, iaǵni jalpy qýaty shamamen 390 GVt bolatyn atom reaktory bar. 19 elde taǵy 52 reaktor salynyp jatyr. Atom energetikasy búginde shamamen jahandaǵy búkil generatsiianyń 10%-yn alady», - dedi vedomstvo basshysy.
Ministr Atom energiiasy jónindegi halyqaralyq agenttik 2050 jylǵa qarai AES generatsiiasy 1,8 ese ósedi dep boljaǵanyn atap ótti.
«Tabiǵi ýran óndirý boiynsha álemde birinshi orynda ekenimizdi aita otyryp, iadrolyq otyn óndirý boiynsha óz quramdastarymyz da bar. Ótken jyly Úlbi metallýrgiia zaýytynda atom elektr stantsiiasyna arnalǵan iadrolyq otyn óndiretin zaýyt ashyldy. Kadrlyq áleýetke keletin bolsaq, jaqynda atom energetikasy salasynda maman daiarlaý boiynsha memorandýmǵa qol qoiyldy. Stantsiianyń qaýipsiz jáne senimdi jumys isteýi kóptegen kadrlardy qajet etedi. Biz eki energetikalyq blogy bar bir stantsiiaǵa aýysymdyq jumysty eskere otyryp, shamamen 2 myń adam qajet bolady dep topshyladyq. Bul 2 myń adamdy tek oqytyp qana qoimai, olardyń osy salada belgili bir jumys tájiribesi bolýy kerek», - dedi Bolat Aqsholaqov.
