Biologiialyq qaýipsizdik salasynda qaterli mikroorganizmdermen tikelei jumys isteitin mamandar daiyndaý úshin 400 grant bólinýi múmkin. QR Densaýlyq saqtaý vitse-ministri – Bas sanitar dáriger Erlan Qiiasov Májilis depýtattaryna osyndai usynys aitty, dep habarlaidy QazAqparat.
Atalmysh bastama «Qazaqstan Respýblikasynyń biologiialyq qaýipsizdigi týraly» zań jobasynyń aiasynda kóterilip otyr.
«Bizde mamandar joq emes, bar. Biraq tolyqqandy biologiialyq qaýipsizdikti qamtamasyz etýge jetkiliksiz. Usynylyp otyrǵan zań jobasynda osy salaǵa jańa mamandardy barynsha kóbirek tartý kózdelgen. Sanitarlyq-epidemiologiialyq beiindegi mamandar daiyndaýǵa 400 grant bólý qarastyrylǵan. Árine, olardy bul salaǵa mamandandyrý mamannyń oǵan deiin alǵan bazalyq bilimine sai júrgiziledi. Óitkeni biologiialyq qaýipsizdik salasynyń mamany ózi jaýap beretin salanyń da mamany bolýy kerek. Eger veterinariia salasyndaǵy biologiialyq qaýipsizdik mamany bolsa, veterinariia salasynyń bazalyq bilimin meńgergen bolýy kerek. Ósimdik sharýashylyǵy bolsa, oǵan sáikes bazalyq bilimi bolý kerek degen siiaqty. Bul jerde bizdiń aityp otyrǵanymyz – biologiialyq tiri organizmdermen jumys isteitin mamandardar. Patogender dep bólip aityp otyrǵanymyz sondyqtan», - dep túsindirdi bas sanitar dáriger.
Vitse-ministr zań jobasyndaǵy bul usynys qabyldansa, joǵary oqý oryndarynyń qoǵamdyq densaýlyq saqtaý fakýltetterindegi oqytý baǵdarlamasy ózgertiletinin atady.
«Eldegi sanaýly joǵary oqý ornynda qoǵamdyq qaýipsizdik fakýltetteri bar. 400 grant bólinse, mamandardy sol fakýltetter bazasynda oqytamyz. Naqty aitsaq, qazir ondai fakýltetter Qaraǵandy jáne Almaty meditsinalyq ýniversietterinde bar. Osyndai JOO-lar bazasynda sanitarlyq-gigienalyq beiindegi mamandar daiarlaý josparlanyp otyr. Ol úshin biz oqytý baǵdarlamasyn ózgertemiz. Sonyń arqasynda atalmysh baǵyttaǵy saǵattar sany kóbeitiledi», - dedi Erlan Qiiasov.
