Bilim salasyndaǵy negizgi kapitalǵa salynǵan investitsiia kólemi 15,7 paiyzǵa qysqardy, dep habarlaidy QazAqparat tilshisi energyprom.kz portalyna silteme jasap.
2021 jyldyń qańtar-qazanynda bilim salasyndaǵy negizgi kapitalǵa salynǵan investitsiia kólemi ótken jyldyń 11 aiymen salystyrǵanda shynaiy mánde 15,7 paiyzǵa qysqaryp, 175,2 mlrd teńgeni qurady. Bir jyl buryn sektordaǵy investitsiia kólemi 20,8 paiyzǵa ulǵaiyp, 201,8 mlrd teńgeni quraǵan bolatyn.
Bilim berý salasyndaǵy investitsiia kóleminiń jartysynan kóbi myna 4 óńirge tiesili: Almaty (31,3 mlrd teńge), Túrkistan oblysy (22,3 mlrd teńge), Shymkent (19,9 mlrd teńge) jáne Nur-Sultan (18,8 mlrd teńge).
Investitsiianyń eń tómengi kólemi Qazaqstannyń batys óńirlerinde oryn aldy: Batys Qazaqstan (3 mlrd teńge), Aqtóbe (3,2 mlrd teńge), Mańǵystaý (3,4 mlrd teńge) jáne Atyraý (3,7 mlrd teńge) oblystary.
Biyl bilim salasyna quiylǵan investitsiianyń jartysynan kóbi, naqty aitqanda 97,4 mlrd teńgesi jergilikti biýdjetterden tústi. Al bir jyl buryn olardyń úlesi jalpy investitsiianyń úshten ekisin quraǵan.
Kásiporyndardyń óz qarajaty jáne respýblikalyq biýdjet qarjysy esebinen salynǵan investitsiia kólemderi tiisinshe 40,1 mlrd jáne 21,9 mlrd teńge boldy.
Banktik emes zaem qarajat esebinen qarjylandyr kólemi aitarlyqtai ósip, 7,9 mln teńgeden 9,1 mlrd teńgege deiin artty. Bilim salasyndaǵy investitsiia qurylymynda bankterdiń krediti 6,2 mlrd teńgeden 6,6 mlrd teńgege deiin ósti.
