QR Bilim jáne ǵylym vitse-ministri Bibigúl Asylova tehnikalyq jáne kásiptik bilim berý júiesindegi negizgi problemalardy atady, dep habarlaidy QazAqparat.
«Biz tehnikalyq jáne kásiptik bilim berý júiesindegi negizgi syn-qaterdi aiqyndadyq. Bul rette tehnikalyq jáne kásiptik bilim berýdiń tartymsyzdyǵy, kadrlar daiarlyǵynda eńbek naryǵyn qanaǵattandyrmaý, memlekettik tapsyrystyń tiimsiz ornalasýy, dýaldy oqytýǵa óndiristiń qyzyǵýshylyq tanytpaýy, bilim berý memstandartyn qatań reglamentteý, materialdyq-tehnikalyq bazanyń nashar qamtylýy, pedagogikalyq kadrlardyń qartaiýy, mamandyqtar boiynsha jumysqa turý deńgeiiniń tómendegi, kolledj qyzmetin syrtqy baǵalaýdyń joqtyǵy baiqalyp otyr», - dedi vitse-ministr Májilisitiń Áleýmettik-mádeni damý komitetiniń keńeitilgen otyrysynda.
Osy oraida ol qazirgi kezde tehnikalyq jáne kásiptik bilim boiynsha kadrlardy daiarlaýǵa memlekettik tapsyrysty jergilikti atqarýshy organdar ornalastyratynyn, bul turǵyda óńirdegi eńbek naryǵyndaǵy qajettilikter eskeriletinin túsindirdi.
«Alaida óńirlerde qajettilik eńbek naryǵyndaǵy aǵymdaǵy bos oryndar negizinde qalyptasqandyqtan, memlekettik tapsyrys kóbine kolledjder ótinimine negizdelip keledi. Kadrlar boiynsha óńirlerdiń orta ári uzaq merzimdegi ekonomika boljamy turǵysynda óńirlik deńgeidegi júielik problema kadrlar daiarlyǵy men eńbek naryǵy qajettiginiń teńgerimsizdigine alyp keledi. Máselen, qurylysta qajettik ortasha eseppen 25,8 myń adamdy qurasa, al oqyp jatqandar sany – 6,2 myń. Al aqparat jáne bailanys baǵytynda 20,7 myń adam kerek bolsa, bilim alyp jatqandar 8,1 myń adamǵa jetken», - dedi B. Asylova.
