Búgin Ulttyq keńes músheleri Bilim jáne ǵylym ministri Ashat Aimaǵanbetovpen Prezident tapsyrmalaryn júzege asyrý máselesin talqylady. Bul týraly QR Prezidentiniń kómekshisi Erlan Qarin jelidegi paraqshasynda jazdy, dep habarlaidy "Ult aqparat".
«Bilim jáne ǵylym ministri Ashat Aimaǵanbetov Ulttyq keńes múshelerimen onlain formatta talqylaýy ótti. Kún tártibindegi negizgi másele mamyr aiynda ótken Ulttyq keńestiń 3-inshi otyrysynda Prezidenttiń bergen tapsyrmalary men keńes músheleri tarapynan aitylǵan usynystardyń júzege asyrylýy boldy. Atalǵan 3-i otyrystyń nátijesi boiynsha, 30 pýnktiden turatyn jospar qabyldanǵan bolatyn. Mine, osy jospardyń oryndalýy boiynsha, árbir usynys qalai qaralyp, qandai sheshim qabyldanyp, qalai júzege asyp jatqany boiynsha ministr arnaiy aqparat berdi. Iaǵni, bul kezdesý memlekettik organdar men qoǵam belsendileri arasynda keri bailanys ornatýdyń jaqsy úlgisi boldy. Ádette memlekettik organdar qoǵam belsendilermen kezdesý ótkizip, suraqtary men usynystaryn tyńdasa da, kóp jaǵdaida sol aitylǵan usynystar qalai qabyldanyp, qalai júzege asyp jatqany boiynsha aqparat bermeidi. Sondyqtan, búgingi kezdesý Ulttyq keńes múshelerine Bilim jáne ǵylym ministrliginen eki ai buryn ótken jiyn barysynda kótergen óz usynystaryna qatysty naqty jaýap alýǵa múmkindik berdi», - dedi E. Qarin.
Sonymen qatar, jiynda Ulttyq keńes músheleri Qanat Nurov, Gúlmira Ileýova, Asylbek Qojahmetov, Aigúl Orynbek, Muhtar Taijan, Erlan Sairov ministrge jurtshylyqty alańdatyp júrgen kóptegen ózekti de ótkir máselelerge qatysty suraqtaryn qoiyp, óz pikirlerin jetkizgen.
«Jiyn aiaǵynda, belgili bir ýaqyt ótkennen keiin talqylaýdy taǵy uiymdastyrý boiynsha sheshim qabyldandy. Jalpy, Ulttyq keńes músheleriniń ortalyq memlekettik bilik organdarynyń basshylarymen kezdesý praktikasy jalǵasatyn bolady. Úkimetpen ministrlerdiń Ulttyq keńes múshelerimen osyndai talqylaýlardy turaqty ótkizý boiynsha jospar qabyldandy. Kelesi aptada Ulttyq keńes músheleriniń ekologiia ministri Maǵzum Myrzaǵalievpen onlain formattaǵy talqylaýy ótedi», - dep tolyqtyrdy QR Prezidentiniń kómekshisi.
