Jyl saiyn bilim berý granttarynyń sany artyp keledi. Biyl respýblikalyq konkýrsqa 64 452 adam qatysyp, 53 785 bilim granty úlestirildi. UBT-dan tómen ball jinap nemese báseke joǵary mamandyqtardy tańdap granttan tys qalǵandar az emes. Olardyń áli de bolsyn aqysyz bilim alýǵa múmkindigi bar
Úkimettiń qosymsha 5000 bilim granty
Biyl kópbalaly jáne ataýly kómek alatyn otbasydan shyqqan balalarǵa nysanaly 5000 bilim granty bólindi. Respýblikalyq konkýrsta grantqa ilikpegen osy sanattaǵy talapkerler 5-15 tamyz aralyǵynda ótetin konkýrsqa qatysa alady. Joǵarǵy bilim berý uiymdarynyń qabyldaý komissiiasyna myna qujattardy tapsyrý qajet:
1. belgilengen úlgidegi ótinish;
2. bilimi týraly qujat (qujattardy qabyldaý komissiiasyna tapsyrǵan kezde tólnusqa);
3. UBT sertifikaty (2019 jylǵy maýsymdaǵy);
4. 086-Ý nysany boiynsha meditsinalyq anyqtama;
5. jeke basyn kýálandyratyn qujattyń kóshirmesi;
6. Kópbalaly otbasylarynyń balalary jáne ataýly áleýmettik kómek alýshy otbasylarynyń balalary mártebesin rastaityn qujat.
Oblys jáne respýblikalyq mańyzy bar qala ákiminiń granty
Jyl saiyn aimaqtarda nemese qalalarda tapshy mamandyqtarǵa qosymsha grant bólinedi. Muny kópshilik «ákim granty» ataidy. Grantty arnaiy komissiia taǵaiyndaidy. Komissiia quramyna ákimniń ózi, áleýmettik qorǵaý, qarjy mekemeleri, qoǵamdyq uiymdar men BAQ ókilderi kiredi. Eń aldymen úmitkerdiń UBT-da jinaǵan upaiyna nazar aýdarylady. Kópbalaly otbasy balalaryna, jetim balalarǵa, múgedekterge, áleýmettik az qamtylǵandarǵa jeńildik beriledi. Qujat 10 tamyzǵa deiin qabyldanyp, komissiia qorytyndysy 25 tamyzdan keiin shyǵady.
Byltyr memlekettik bilim granttaryna qosymsha jergilikti atqarýshy organdarynyń esebinen 2700 jýyq grant bólingen.
Rektor granty
Oqý jylynyń basynda arnaiy komissiia sheshimimen keibir ýniversitetterde ishki granttar taǵaiyndalady. Muny kópshilik «Rektor granty» dep ataidy. Úmitkerdiń otbasy jaǵdaiy, úlgerim kórsetkishi jáne ýniversitettiń qarjylyq múmkindigi qaralady. Oqý aqysy tegin bolǵanymen, stipendiia tólenbeidi. Keibir ýniversitetter birinshi ne sońǵy oqý jylynyń aqysyn tóleýi múmkin. Al endi biri stýdentterdiń ártúrli sanatyna bailanysty 10-50% jeńildikter usynady.
Ishki bilim berý granttary men jeńildikter, áleýmettik kómek týraly aqparatty ýniversitetterdiń saitynan bilýge bolady.
Bos bilim berý granty
Aqyly oqýǵa túsken stýdent grantqa aýysa alady. «Bilim berý grantyn berý erejesin» bekitý týraly Qazaqstan Respýblikasy Úkimetiniń 2008 jylǵy 23 qańtardaǵy №58 Qaýlysy boiynsha stýdent ár semestrden keiin joǵary bilim alý protsesinde bosaǵan bos bilim berý granttaryn berýge qujattardy tapsyrýǵa quqyly.
Bilim berý salasyndaǵy ýákiletti organ bos bilim berý granttarynyń tizbesin jasap, ashyq konkýrs jariialaidy. Aqyly negizde oqityn stýdent dekanatqa ótinish jáne barlyq oqý kezeńi ishindegi úlgeriminiń ortasha baly kórsetilgen joǵary oqý ornynyń basshysy rastaǵan onyń oqý kartochkasynyń nemese transkriptiniń úzindisin usynady. Qujattar 25 qańtarǵa deiin jáne 25 shildege deiin qabyldanady.
Bos bilim berý grantyn ielený úshin barlyq oqý jylynda baǵańyz jaqsy bolýy tiis. Ýniversitettegi qoǵamdyq jumystarǵa belsendi qatysatyn stýdentterge de basymdyq beriledi.
