Memlekettik bilim granty iegerleri joǵary oqý oryndaryna qabyldaný úshin qujattaryn 25 tamyzǵa deiin tapsyrýy tiis, dep habarlaidy "Ult aqparat" QR Bilim jáne ǵylym ministrliginiń baspasóz qyzmetine silteme jasap.
Ol úshin e.Gov.kz «elektrondyq úkimet» portaly arqyly ótinim berý qajet. Qyzmet túri 2021 jyldyń 17 tamyzynan bastap qoljetimdi bolady.
«Joǵary oqý oryndaryna aqyly negizde qabyldaný úshin JOO-lardyń virtýaldyq qabyldaý komissiialaryna júginý qajet. Tizim QR BǴM Ulttyq testileý ortalyǵynyń saitynda ornalastyrylǵan», - delingen habarlamada.
Aita keteiik, 14 tamyzda bilim grant iegerleriniń tizimi jariialandy.
Prezidenttiń tapsyrmasy boiynsha granttyń jalpy sany 5000-ǵa artyp otyr. Osylaisha biyl bakalavriatqa 56 myń grant bólindi. Konkýrsqa qatysý úshin barlyǵy 75 myńnan astam ótinim berilgen.
Biyl granttyń basym bóligi – 17 028 grant injenerlik, óńdeý jáne qurylys salalaryna bólinip otyr. Budan bólek, pedagogikalyq ǵylymdarǵa – 9 573 grant, aqparattyq-kommýnikatsiialyq tehnologiialarǵa – 7 487 grant, jaratylystaný ǵylymdaryna – 4 088 grant, aýyl sharýashylyǵy ǵylymdaryna – 1 895 grant, densaýlyq saqtaý salasyndaǵy mamandyqtarǵa – 2 700 grant, óner jáne gýmanitarlyq ǵylymdarǵa – 1 615 grant, biznes, basqarý jáne quqyq – 1 223 grant, al áleýmettik ǵylymdar, jýrnalistika jáne aqparat mamandyqtaryna 960 grant bólindi.
