Bilim berý uiymdaryn attestattaý qaǵazdyń kóbeiýine ákep soqpaýy kerek. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Memlekettik attestaýdan ótpek bolǵan balabaqshalardyń 80 paiyzǵa jýyǵy attestatsiia rásiminen óte almady. Bul - sapa boiynsha suraq bar degendi bildiredi. Osy ýaqytqa deiin balabaqsha deńgeiinde memlekettik baqylaý tetigi bolmaǵan. Jáne de ózderińiz jaqsy bilesizder, balabaqshalar litsenziiany da almaidy. Litsenziiasyz jumys isteidi. Bul sheshim kezinde balabaqshalardyń sanyn jyldam ulǵaitý úshin qoldanylǵan bolatyn. Nátijesinde qazirgi ýaqytta 3-6 jas aralyǵyndaǵy balalardy 99 paiyz qamtý kórsetkishine jetip otyrmyz. Bul óte jaqsy kórsetkish. Biraq, bizge keregi – sapa. Ata-analar tarapynan biraz suraq týyndap júrgenin jaqsy bilemiz. Sondyqtan memlekettik baqylaýdyń bolýy óte mańyzdy. Osyǵan orai zańnamaǵa tiisti ózgertýler engizilip, biz birinshi ret balbaqshalardyń attestatsiiasyn ótkizdik», - dedi ol ministrliktiń apparat jinalysynda.
Ministrdiń atap ótýinshe, mektepke deiingi bilim berý uiymdaryn attestattaý aldaǵy ýaqytta keńinen qoldanylatyn bolady.
«Attestattaýdy jyl boiy ótkizetin bolamyz. Jekemenshik bolsyn, memlekettik bolsyn barlyq balabaqshaǵa qajetti sapany qamtamasyz etý boiynsha baqylaý bolady. Sol baqylaýǵa sai tiisti is-sharalar da qabyldanady. Bul óte mańyzdy. Attestattaýdy qaǵaz toltyrý rásimine ainaldyrmaýymyz kerek. Balabaqsha, mektep, kolledj deńgeiinde baqylaý ótkizgende qujat máselesine kóńil bólmei, naqty sapaǵa nazar aýdarý qajet. Attestattaý jáne basqa da baqylaý is-sharalary qaǵazdyń kóbeiýine ákep soqpaýy kerek», - dedi Ashat Aimaǵambetov.
