«Adal bilim» jobalyq keńesiniń ákimshisi Sergei Pen bilim berý salasyndaǵy ońtailandyrý kimderden bastalatynyn aitty, dep habarlaidy QazAqparat.
QR Sybailas jemqorlyqqa qarsy is-qimyl agenttiginde ótken brifing barysynda «Adal bilim» jobalyq keńesiniń ákimshisi Sergei Pen bilim berý salasyndaǵy ońtailandyrýdyń ekinshi kezeńi qalai júrip jatqanyn baiandady.
«QR Bilim jáne ǵylym ministrligine baǵynatyn 50-den astam kvazimemlekettik uiym bar. Olarda 8 myńnan astam qyzmetker jumys isteidi. Jyl saiyn bul uiymdardyń jumysyna 20 mlrd teńgeden astam biýdjet qarajaty jumsalady. Ministr Ashat Aimaǵambetovtiń ózi bastamashy bolǵan ońtailandyrýdyń birinshi kezeńi aiaqtaldy. Tek tehnikalyq, quqyqtyq bóligi qaldy. Uiymdastyrý-quqyqtyq formasyn ózgertý maqsaty iske asty deýge bolady. Keibir mekemelerdi biriktirip, eńbekaqy qoryn qaita qaraý jumystary aiaqtaldy. Ekinshi kezeńi áldeqaida kúrdeli dep aitýǵa bolady. Arnaiy qurylǵan jumys toby tereń fýnktsionaldyq taldaý júrgizedi. Qyzmetter bir-birin qaitalap jatqan joq pa? Memlekettik tapsyrma qanshalyqty oryndy qoiylǵan? Ol negizdi iske asyp jatyr ma? Atalmysh qyzmetti básekeli ortaǵa jiberse ne bolady? Osy mazmundaǵy saýaldar tóńireginde zertteý júrgiziledi. Eńbekaqy qory, ákimshilik shyǵyndar, ǵimarat jaldaý quny jáne onyń oryndylyǵy, ol ǵimaratty kútip-ustaý, oǵan qyzmet etetin jumysshylar shtaty qanshalyqty tiimdi qurylǵany da jan-jaqty zerdelenedi. Osydan keiin baryp atalǵan uiymdar qyzmetiniń tiimdiligi qaralady», - degen Sergei Pen ońtailandyrý eń áýeli qai uiymdardy qamtýy múmkin ekenin aitty.
«Mysaly «Órleý» mekemesi biliktilikti arttyrýmen ainalysady. Bizdiń qai óńirde qansha adam biliktiligin arttyryp, qandai nátijege qol jetkizgenin bilgimiz keledi. Ol iske kim jaýapty bolǵanyn, qansha qarajat ketkenin, biliktilikten ótken mamannyń shynymen sapaly qyzmetkerge ainalǵanyn qandai ólshemder dáleldeitinin anyqtaimyz. Birinshi kezekte qarjyny eń kóp shyǵyndaityn uiymdar ońtailandyrýǵa ushyraidy. Olar «Órleý», «Kásipqor», «Sitýatsiialyq taldaý ortalyǵy» siiaqty 8 iri uiym. Atalmysh uiymdardyń 17 óńirde filialdary bar. Olardyń bári ol jaqta qanshalyqty ttiimdi jumys istep jatqanyn bilgimiz keledi», - dedi «Adal bilim» keńselik jobasynyń ákimshisi.
