QR Aqparat jáne qoǵamdyq damý ministrliginiń Azamattyq qoǵam isteri jónindegi komitetiniń tóraiymy Áliia Ǵalymova «QR-da beibit jiyndardy uiymdastyrý jáne ótkizý tártibi» týraly zań jobasy usynyp otyrǵan negizgi ózgerister týraly aityp berdi, dep habarlaidy QazAqparat.
«Bul – múlde jańa zań jobasy. 1995 jyly qabyldanǵan zańǵa qaraǵanda bári túsinikti. Beibit jiyndardyń barlyq túrine, atap aitqanda mitingiler men sherýlerdiń, demonstratsiialar men piketterdiń bári de zań jobasynda túsindirile jazylǵan. Ekinshiden beibit jiyndardy ótkizýdiń reglamenttelip, eskertý tártibi engizilip jatyr. Beibit jiynǵa ótinish berýshini óz uiymyn nemese qoǵamdy alańdatqan máseleler boiynsha suraqtar mazalasa, ol jergilikti atqarýshy organǵa mitingi týraly ótinim berip, ótinishinde jiyndy ótkizýdiń orynyn, maqsatyn jáne merzimin belgilep, kórsete alady», - dedi Áliia Ǵalymova elordada zań jobasynyń tujyrymy talqylanǵan jiyn aldynda tilshilerge.
Onyń aitýynsha, zań jobasynda beibit jiynǵa qatysýshy barlyq taraptyń quqyqtary aiqyndalǵan.
«Beibit jiyndy uiymdastyrýshy, oǵan qatysýshy, jýrnalist – olardyń quqyqtary men ókilettigi naqty jazylǵan. Bul óte mańyzdy qadam. Burynǵy zańda bul bólik qarastyrylmaǵan edi. Sonymen qatar jergilikti atqarýshy organ árbir turǵylyqty jerde arnaiy (qala shetinde emes) oryndy aiqyndaidy. Máslihattardyń sheshimi boiynsha turǵylyqty jerde beibit jiyn ótkizýge bolatyn birneshe alań beriledi», - dedi ministrlik ókili.
Áliia Ǵalymova arnaiy oryndardy aiqyndaý kezinde jergilikti atqarýshy organdar azamattardyń qaýipsizdigi men sol jerge jete alý jaǵdaiyn, kólik múmkindikteri men infraqurylymyn eskeretinin aityp ótti.
«Qoldanystaǵy zań jobasynda mundai naqty forma joq. Máselen Nur-Sultan qalasynyń máslihaty tek alańdar tizimin aiqyndady. Basqa turǵylyqty jerlerde máslihattar beibit jiyn erejeleriniń qosymsha sharttary týraly aityp jatyr. Bul tájiribeni ortaq júielilikke alyp keledi», - dedi ol.
Eske sala ketsek, QR Aqparat jáne qoǵamdyq damý vitse-ministri Daniiar Esin Ádilet ministrliginde ótken vedomstvoaralyq komissiia otyrysynda «Qazaqstan Respýblikasynda beibit jiyndardy uiymdastyrý jáne ótkizý tártibi» týraly zań jobasynyń tujyrymyn tanystyrǵan bolatyn.
