Aqparat jáne qoǵamdyq damý ministrligi «Qazaqstan Respýblikasynda beibit jinalystardy uiymdastyrý men ótkizý tártibi týraly» jáne «Qazaqstan Respýblikasynyń keibir zańnamalyq aktilerine Qazaqstan Respýblikasynda beibit jinalystardy uiymdastyrý men ótkizý tártibi máseleleri boiynsha ózgerister men tolyqtyrýlar engizý týraly» zań jobalary mátinindegi grammatikalyq qatelikterge qatysty túsinikteme berdi.
Ministrlik Qazaqstan Respýblikasynyń «Normativtik quqyqtyq aktiler týraly» Zańynda jáne zań jobalaý jumysyn uiymdastyrý qaǵidalarynda zań jobalaryn ázirleý kezinde saqtalatyn naqty erejeler qarastyrylǵanyn atap ótken.
«Mindetti talaptardyń biri - zań jobalaryn ǵylymi-lingvistikalyq saraptaý. Bul jaǵdailar beibit jinalystar týraly zań jobalaryn ázirleý kezinde eskerildi, zań jobalarynyń mátini Parlamentte talqylanýǵa deiin eki ret qajetti tekserýler men lingvistikalyq saraptamadan ótti. Ǵylymi-lingvistikalyq tekserýler nátijeleri boiynsha barlyq eskertýler eskerilip, qateler túzetildi» dep jazylǵan habarlamada.
Málimetke sai, zań jobalary Parlamentke usynylǵan kezde olarǵa ilespe qujattar, onyń ishinde ǵylymi-lingvistikalyq saraptama qorytyndylary qosa beriledi. Anyqtalǵan qatelikter týraly aqparat beibit jinalystar týraly zań jobalarynyń bastapqy nusqasyna qatysty, zań jobalary Parlamentke jiberilgenge deiin bul qateler joiyldy.
