Álemdik qaýymdastyqtyń Mańǵystaý oblysyndaǵy beibit halyqqa oq atyldy degen pikirin Prezidenttiń aǵylshyn tilinde jazǵan tvit-jazbalary ózgertti. Memleket basshysynyń baspasóz hatshysy Berik Ýáli «Habar 24» telearnasyna bergen suhbatynda osyndai oi aitty, dep habarlaidy QazAqparat tilshisi.
«Memleket basshysy Twitter-degi paraqshasynda aǵylshyntildi aýditoriiaǵa arnap, aǵylshyn tilinde onshaqty tvit-jazba qaldyrdy. Óitkeni shyny kerek, kóptegen álemdik qaýymdastyqtyń ókilderi bizdegi ahýaldy eń alǵash Mańǵystaýda bastalǵan beibit sherý dep qabyldap júr. Soǵan qarsy oq atty degen piǵyldan áli ainyǵan joq. Sol sebepti biz aqparat quraldaryna, ásirese sheteldik BAQ-qa kúl-talqan bolǵan Almatynyń, Tarazdyń, Shymkenttiń, Almaty oblysynyń kóshelerin, marqum bolǵandar týraly, zardap shekkenderdi kóbirek kórsetýimiz kerek. Óitkeni olar bizdi beibit halyqqa oq atty dep oilap otyr. Shyn mánisinde jetik deńgeide uiymdasqan, arnaiy sodyrlyq jasaq daiyndyqpen kelgenin qazirgi tańda tergeý organdary anyqtap, aityp bere alady», - dedi Berik Ýáli.
Onyń aitýynsha, Batystaǵy halyqaralyq qaýymdastyqtyń bul pikirin Prezidenttiń aǵylshyn tilinde jazylǵan tvit-jazbalary ózgertken.
«Shyny kerek, sol tvit-jazbalar sheteldegi halyqaralyq uiymdar, sheteldegi áriptester tarapynan qoldaý taýyp, qazirgi tańda Prezident qabyldaǵan eldi sodyrlardan azat etý baǵytyndaǵy kontrterrorlyq operatsiiaǵa qoldaý bildirip jatqany ras.
Biz tym-tyrys úndemei otyrsaq, olar qaidan biledi? Sol sebepti Memleket basshysy Premer-Ministrdiń orynbasarynyń jáne Syrtqy ister ministriniń mindetin atqarýshy Muhtar Tileýberdige naqty tapsyrma berdi. Osy baǵyttaǵy jumysty jandandyryp, sheteldik áriptesterge, Eýropaǵa, Batysqa osy jóninde naqty aqparatty, shynaiy, bolǵanyn bolǵandai etip, qospasyz kórsetýge tapsyrma berdi. Qazir Syrtqy ister ministrligi sol baǵytta aýqymdy jumysty bastap ketti», - dedi Prezidenttiń baspasóz hatshysy.
