QR Indýstriia jáne infraqurylymdyq damý ministri Beibit Atamqulov ekinshi indýstriialyq besjyldyqtyń nátijelerin aitty, dep habarlaidy "Ult aqparat".
«2019 jyl ekinshi indýstriialyq besjyldyqty iske asyrýdyń sońǵy jyly bolyp otyr. Baǵdarlamany iske asyrý jyldary Qazaqstanda jańa indýstriialyq baza paida boldy. Ol elimizdiń kóptegen óńirlerinde ónimdi jumysty jáne ekonomikanyń turaqtylyǵyn qamtamasyz etti. Óńdeýshi ónerkásip kásiporyndary 43 trln teńgeniń ónimin (2010-2019 jyldary) shyǵardy. Qarasha aiynda óńdeýshi ónerkásip óndirisiniń kólemi bir aida alǵash ret 1 trln teńgeden asyp tústi», - dedi Atamqulov Memleket basshysy Qasym-Jomart Toqaevtyń qatysýymen ótken «Altyn sapa» syilyǵyn tabystaý rásimine arnalǵan jiynda.
Osy oraida, ministr saladaǵy eńbek ónimdiligi 35 myń dollarǵa jetkenin atap ótti.
Sonymen qatar, salada negizgi kapitalǵa investitsiia aǵyny atalǵan merzimde 4,5 trln teńgeden (2015-2019 jyldary) asty.
«Atalǵan merzimde qazaqstandyq kásiporyndar óńdeýshi ónerkásip ónimderin 70 mlrd dollar kóleminde eksporttady. 2015 jyldan beri 5 trln teńgege jýyq investitsiia kólemimen Indýstriialandyrý kartasynyń 500-den astam jańa jobasy iske qosyldy», - dedi ministr.
Sonymen qatar, vedomstvo basshysy metallýrgiiada óndiris kólemi 2,2 esege artqanyn jetkizdi.
