Nur-Sultan qalalyq máslihatynyń hatshysy Erlan Qanalimov elektrondy shylymdy temeki buiymdaryna teńestirýdi usyndy, dep habarlaidy QazAqparat.
«Bilim basqarmasy men Politsiia departamentiniń birge nazar aýdarýyn suraimyn, qazir elektrondy shylymǵa qatysty úlken másele týyndady. Bul bizdiń qoǵamnyń qazirgi naqty máselesi. Joǵary synyp oqýshylary temeki shegedi dep aitpai-aq qoiaiyn, qazir besinshi synyp oqýshylary da tartatyn bolǵan. Olar barlyq jerde satylady, aktsizdelmeidi – kez kelgen adamǵa satyla beredi. Oǵan bir shara qoldanaiyq! Múldem tyiym salý kerek dep aitpaimyn, satyla bersin, biraq ony temeki ónimderine teńestirip, 21 jastan asqandarǵa ǵana berilýi kerek. Bulai jalǵasa berýge bolmaidy!», - dedi Erlan Qanalimov máslihattyń turaqty komissiiasynyń otyrysynda.
«Biz tutas býyndy ýlandyryp otyrmyz. Olar qazir saldaryn oilamaýy múmkin, ziiany joq dep oilaidy, biraq bedeýlik sekildi kóptegen máselege ákelýi múmkin. Bul bizdiń urpaǵymyz. Endi ne isteý kerek? Qandai joldary bar? Osy másele boiynsha sizdermen birge sheshim qabyldaiyq», - dedi Erlan Qanalimov.
Qoǵamdyq densaýlyq saqtaý basqarmasynyń basshysy Timýr Muratov depýtattyń usynysyn qabyldady jáne vedomstvonyń bul máseleni sanitarlyq-epidemiologiialyq qadaǵalaýǵa jetkizetinin aitty.
