Ujymdyq qaýipsizdik týraly shart uiymynyń áskeri bir aptanyń ainalysynda elden qaitady. Bul týraly QR Prezidentiniń baspasóz hatshysy Berik Ýáli «Habar 24» telearnasyna bergen suhbatynda aitty, dep habarlaidy QazAqparat tilshisi.
«Ujymdyq qaýipsizdik týraly shart uiymynan kirgen kúshtiń negizgi missiiasy - elimizde strategiialyq nysandardy kúzetý. Taǵy qaitalap aitamyn, strategiialyq nysandardy Ujymdyq qaýipsizdik týraly shart uiymynyń áskeri qorǵaǵandyqtan, bizdiń qarýly kúshterimizdiń, Ulttyq ulannyń áskerleri terrorister kóp shoǵyrlanǵan Almaty qalasy, Almaty oblysy jáne basqa da óńirlerde solardyń kózin joiýǵa erkin múmkindik aldy. Iaǵni, bizdiń strategiialyq nysandardy Ujymdyq qaýipsizdik týraly shart uiymynyń áskeri qorǵaidy da, ózimizdiń áskeriler barlyq terroristerdiń kózin joiýǵa árekettendi. Bul bizge úlken kómek boldy», - degen Memleket basshysynyń baspasóz hatshysy jalpy jaǵdai turaqtalǵan soń, UQShU elderi áskerleriniń missiiasy aiaqtalatynyn atady.
«Olardyń eshqaisysy qalmaidy. Birden óz elderine ketedi. Ujymdyq qaýipsizdik týraly shart uiymy degen jalǵyz Resei ǵana emes, ózderińiz bilesizder. Biyl tóraǵalyq etip otyrǵan Armeniia bar, Belarýs, Tájikstan bar. Bul áskerdiń bári kóp turaqtamaidy. Ary ketse bir apta kóleminde ketedi. Múmkin, oǵan da jetpeidi. Bári qaitarylady. Onyń ústine qazir bilip otyrsyzdar, jaǵdai turaqtalyp kele jatyr», - dedi Berik Ýáli.
