Memleket basshysynyń baspasóz hatshysy Berik Ýáli Facebook-tegi paraqshasynda Prezidenttiń merekeden keiin keletin demalys kúnderi memlekettik qyzmetshilerdiń jumysqa shyǵýy týraly tvitine túsindirme jariialady. "Ult aqparat" mátinniń tolyq nusqasyn oqyrman nazaryna usynady.
***
Prezidenttiń merekeden keiin keletin demalys kúnderi memlekettik qyzmetshilerdiń jumysqa shyǵýy týraly tvitine túsindirme
Memlekettik qyzmetshilerdiń demalys jáne meiram kúnderindegi jumysy jóninde Prezident Q.Toqaevtyń keshegi jazǵan jariialanymyna bailanysty meniń atyma kóptegen ótinish kelip túsip jatyr.
Birneshe kúnge sozylatyn mereke men odan keiin keletin demalystar kezindegi ortalyq jáne jergilikti atqarýshy organdardyń is-áreketsizdigi Memleket basshysynyń osy jazbasyna sebep boldy.
Búginde elimiz kórshiles memleketterdegi koronavirýs indetiniń taralý qaýpimen, tabiǵi jáne tehnogendi sipattaǵy tótenshe jaǵdailarmen (qardyń qalyń bolýy, sý tasqyny) jáne basqa da qaterlermen betpe-bet kelip otyrǵanyn bilesizder. Munyń bári barlyq memlekettik qurylymdardyń shuǵyl ári júieli jumys isteýin talap etedi.
Sondyqtan Prezident memlekettik qyzmetshilerdiń merekelerden keiin keletin kúni (dúisenbi) jumysqa shyǵýyn oryndy sanaidy. Bul jerde Prezident Ákimshiliginiń, Úkimettiń, ministrlikterdiń, Memleket basshysyna tikelei baǵynyshty vedomstvolardyń, oblystar men respýblikalyq mańyzy bar qalalardyń ákimdikteriniń qyzmetkerleri týraly sóz bolyp otyr.
Osy rette, Qazaqstannyń zańnamalary tolyq saqtalýy tiis.
«Qazaqstan Respýblikasyndaǵy Memlekettik qyzmet týraly» Zańnyń 32-babyna sáikes, demalys jáne mereke kúnderi kezek kúttirmeitin, aldyna ala josparlanbaǵan jumystardy oryndaý úshin memlekettik qyzmetshilerdi jumysqa shaqyrýǵa bolady.
Eńbek kodeksi boiynsha, memlekettik qyzmetshiler ózderiniń jazbasha kelisimimen ǵana jumysqa shyǵa alady jáne olardyń eńbegine aqy tólenýi tiis.
Eńbek kodeksiniń 85-babyna sáikes, demalys, mereke kúnderi jumysqa shyqqan qyzmetkerge óz qalaýy boiynsha bir kúndik demalys beriledi nemese bir kúndik eńbekaqysy keminde 1,5 ese kóleminde tólenedi.
Osylaisha Eńbek kodeksiniń talaptaryn saqtai otyryp, memlekettik qyzmetshilerdi merekeden keiingi demalys kúni de jumysqa shaqyrýǵa bolady.
Jalpy zańnama ózgermeidi. Memleket basshysy ondai tapsyrma bergen joq.
Qasym-Jomart Kemelulynyń jańa eńbek etikasyn qalyptastyrýǵa, memlekettik qyzmetshiler men elimizdiń barlyq azamattaryn eńbekqorlyq pen jaýapkershilik ideologiiasyn ilgeriletýge shaqyrǵanyn atap ótkim keledi.
Esterińizde bolsa, osydan birneshe kún buryn Prezident Jambyl oblysynda azamattarymyzdy eńbekqorlyqtyń, tabandylyqtyń, parasattylyqtyń úlgisin kórsetýge shaqyrǵan bolatyn. Qasym-Jomart Kemelulynyń osy sózderi, eń birinshi kezekte, memlekettik qyzmetshilerge baǵyttalǵanyna senimdimin!
