Prezidenttiń baspasóz hatshysy Berik Ýáli Abai óleńinen úzindi oqý estafetasyna qosyldy, dep habarlaidy "Ult aqparat".
«Jaqynda «Jas qazaq» ulttyq aptalyǵyna belgili abaitanýshy ǵalym, búginde jasy 90-nan asyp otyrǵan ádebietimizdiń abyz aqsaqaly Mekemtas Myrzahmetov aǵamyzdyń tamasha suhbaty shyqqan edi. Osy suhbatty Memleket basshysy Qasym-Jomart Kemeluly da oqyp, «Bul kisige estafetany óziń berseń jón bolady» dep maǵan arnaiy tapsyrǵan bolatyn. Prezidenttiń osy tapsyrmasy boiynsha dana Abaidyń bir óleńin oqymaqpyn», - degen Berik Ýáli «Áýelde bir sýyq muz — aqyl zerek» óleńin oqyp berdi.
Prezidenttiń baspasóz hatshysy Abai óleńderin oqý estafetasyna Qasym-Jomart Toqaev ta qoldaý bildirip, aqynnyń óleńin oqyǵanyn eske saldy. Onyń aitýynsha, Memleket basshysy osy igi bastamanyń birrettik naýqan bolyp qalmaýyna úlken mán berip otyr.
«Osyǵan orai, Prezident Ákimshiliginiń Basshysy Qyrymbek Eleýuly elimizdegi diplomatiialyq ókildikter men shetelderdegi bizdiń elshilikterdi, Qazaqstan halqy Assambleiasyn, Dúniejúzi qazaqtarynyń qaýymdastyǵyn, Abaidyń esimin ielengen joǵary oqý oryndary men kolledjder ujymdaryn, orta mektepterdi, Abai aýdandary men aýyldaryn, tipti, qala berdi Abai esimdi azamattardyń bárin qamtyǵan shyn mánindegi jalpyhalyqtyq estafetaǵa ainaldyrý maqsatynda, tiisti mekemelerge arnaiy Tapsyrma-jospar ázirleýge nusqaý berdi. Budan Abai shyǵarmalaryn oqý estafetasynyń qanshalyqty mańyzdy ekenin ańǵarýǵa bolady», - deidi ol.
Berik Ýálidiń aitýynsha, bul igi bastama bir jyl boiy ótip, kelesi jyldyń osy ýaqytyna belgilenip otyrǵan aqynnyń 175 jyldyq mereitoiyna deiin jalǵasýy tiis.
«Elimizdiń barlyq azamattaryn osy chellendjge atsalysýǵa taǵy da shaqyramyn. Endi osy estafetany belgili abaitanýshy, ǵalym Mekemtas Myrzahmetov aǵamyzǵa, belgili memleket jáne qoǵam qairatkeri, ǵalym Amangeldi Aitaly aǵamyzǵa, jazýshy, alashtanýshy-ǵalym Tursyn Jurtbai aǵamyzǵa, sondai-aq dosym Táýbajanǵa jáne jalpy abaitanýshy, zertteýshi ǵalymdardyń bárine joldaimyn», - dep túidi ol.
