Jambyl oblysynyń ákimi Berdibek Saparbaev T.Rysqulov aýdanyna jumys sapary barysynda jaiylymdyq jerlerdi bólýge qatysty jergilikti turǵyndar arasynda daý týyndaǵan Tereńózek aýylynda boldy, dep habarlaidy "Ult aqparat".
Jalpy, Tereńózek aýyldyq okrýgi aýmaǵyndaǵy jaiylymdyq jer kólemi 42233 gektardy quraidy. Mal baǵýǵa arnalǵan osyndai aýqymdy aýmaq bola tura, jergilikti turǵyndar ózara kelisimge kele almaýda.
Tereńózektikter ózderi aitqandai, aýyldaǵy kóptegen otbasylar qoralarynda onshaqty iri qara jáne usaq maldar men jylqylar ustaidy. Keibireýlerindegi mal sany júz basqa deiin jetedi. Úsh myńnan astam adam turatyn aýyldyq okrýgte 2493 iri qara, 34625 usaq mal jáne 1144 jylqy bar. Barlyǵy 85 sharýa qojalyǵy tirkelgen.
Jaqynda ǵana 2305 adam turatyn Tereńózek aýylynyń turǵyndary áleýmettik jelilerde jaiylymdyq jerlerdiń jetispeýshiligin aityp, shaǵymdanǵan bolatyn.
Kezdesý barysynda T.Rysqulov aýdanynyń ákimi Erbolat Sadyrqulov turǵyndar arasyndaǵy kelispeýshilik aýyl irgesindegi jaiylymdyq jerlerge qatysty týyndaǵanyn atap ótti. Alaida, ol bul jerlerdi bólý bekitilgen normalarǵa sáikes júrgizilgenin jetkizdi. Ol turǵyndarǵa aýyl syrtyndaǵy 12622 gektar jaiylymdyq jerlerdi paidalaný boiynsha usynys bildirgen.
Jergilikti turǵyn Alpys Dúrmenov jer bólý kezinde ár aýladaǵy adam sany eskerilmegenin alǵa tartady.
«Menińshe, jaiylymdyq jerler balalar sanyna qaramai, ártúrli bólinýde. Kóp balaly otbasylarǵa da, bir balaly otbasylarǵa da birdei kólemdegi jaiylym tiedi», - dedi ol.
Oblys ákimi kez kelgen másele zań sheńberinde sheshiletinin atap ótti.
«Eshqandai jer paidalanýsyz jatpaýy kerek, ol tabys ákelýi tiis. Sondyqtan bir apta ishinde aýdan jáne aýyl ákimderi osy eldi meken mańyndaǵy jerlerge taldaý júrgizedi. Paidalanýsyz jatqan jerlerdi ieleri memleketke qaitarýy kerek. Ol
jergilikti turǵyndarǵa mal sanyna sáikes bólinedi», - dep túsindirdi Berdibek Saparbaev.
Degenmen, aimaq basshysy maldyń negizgi bóligi aýyl syrtyǵyndaǵy jaiylymdarda jaiylýy tiistigin tilge tiek etip, onda jerdiń jetkilikti ekendigin basa aitty.
«Qalai desek te, aýyldyń irgesindegi jer bárine birdei jetpeidi. Sondyqtan, malshy jaldap, alysqa jaiýǵa týra keledi. Sondai-aq, mundai shaǵyn aýmaqta 80-nen astam sharýa qojalyǵynyń bolýy – óte kóp, olardy biriktirý qajet. Buǵan jergilikti aqsaqaldar atsalysqany abzal. Jalpy, bul máselelerdiń barlyǵyn aýyldyń burynǵy ákimi sheshýi kerek edi», - dep atap ótti óńir basshysy.
Sondai-aq, Berdibek Saparbaev Tereńózek turǵyndaryna aýyl sharýashylyǵy daqyldaryn ósirýde úi mańyndaǵy jerlerdi tiimdi igerýdiń mańyzdylyǵyna toqtaldy.
Kezdesý barysynda basqa da ózekti jaittar qaýzalyp, aýyl sharýashylyǵy ónimderin qaita óńdeý máselesine de den qoiyldy.
