Koronavirýsqa qarsy vaktsina alý mindetti bolýy kerek nemese tiisti sertifikatpen yntalandyrylýy qajet. Briýssel ýniversiteti aýrýhanasynyń (UZ Brussel) bas direktory Mark Noppen belgiialyq BAQ-qa osyndai pikir bildirdi, dep habarlaidy QazAqparat.
Onyń pikirinshe, mundai shara halyqty COVID-19-ǵa qarsy vaktsinalaý qarqynyn arttyrý úshin engizilýi kerek.
«Brussels times» gazetine bergen suhbatynda belgiialyq maman M. Noppen Briýsselde vaktsinamen qamtý qalanyń basqa bólikterine qaraǵanda áldeqaida tómen ekenin atap ótti. Onyń aitýynsha, astanada vaktsinalaýdy keńinen qamtý ońai emes. Muny Belgiia biliginiń kóptegen bastamasy kórsetip otyr.
«Briýsseldegi vaktsinalaý kórsetkishterimiz London, Parij, Amsterdam nemese Rotterdam kórsetkishterimen birdei», – dedi M.Noppen.
Onyń pikirinshe, bul shyn máninde astanalyq fenomen ǵana.
«Problemanyń kóp bóligi – adamdar tobyna Covid-19 vaktsinalary tiimdi jáne qaýipsiz ekeni týraly aqparat berilmeitindiginde nemese durys habary joq. Biz qoǵamdy durys habardar etýimiz kerek», – dedi M.Noppen.
M. Noppen meditsinalyq qyzmetkerlerdi mindetti túrde vaktsinalaýdy jaqtaidy.
«Alaida Briýsseldegi naýqastarǵa kútim kórsetý ortalyqtaryndaǵy vaktsinalaýdyń qazirgi deńgeii áli de 50%-dan tómen, bul mekemelerge kelýshiler úshin qaýip tóndiredi. Biz buǵan shydai almaimyz», – dedi maman.
«Qandai da bir sebeptermen vaktsina túbegeili qarsy turatyn adamdar toby bar. Olardy eshqandai utymdy dáleldermen sendire almaisyń», – deidi M.Noppen.
Osylardy aita kele ol eki baǵyttyń taktikasyn qoldaidy: vaktsina alýdy mindetti etý nemese vaktsinadan ótýdi qalaityndarǵa sertifikattar bere otyryp yntalandyrý.
«Anti-vakserlerdi aiamaimyz», – qorytyndylady sózin Belgiia ýniversitetiniń ǵalymy.
