Almatyda 69 jasynda belgili teatr rejisseri, dramatýrg, qoǵam qairatkeri Bolat Atabaev dúnieden ozdy. Bul týraly belsendiler men quqyq qorǵaýshylar habarlady. Aqparatty Mádeniet jáne sport ministrligi de rastady. Atabaev 28 shilde kúni aýrýhanada kóz jumǵan. Birer kún buryn rejisserdiń Almaty aýrýhanasynyń jan saqtaý bólimine túskeni habarlanǵan edi.
Qaraly habardy elge estirtkender arasynda Músirepov atyndaǵy drama teatrdyń direktory Azamat Satybaldy da bar.
"Qosh bolyńyz, kemeńger rejisser. Qosh bolyńyz, ulaǵatty ustaz. Qosh bolyńyz, elin súigen asyl er. Qosh bolyńyz Bolat aǵa. Janyńyz jánnattyq bolsyn. Bolat Atabaev máńgi mekenine attandy. Alla aldynan jarylqasyn", - dep jazdy ol Instagram-paraqshasynda.
Rejisser byltyr Germaniiada aýyr operatsiiany bastan keshirgen. Onyń Qazaqstanǵa oralǵanyna kóp bolmaǵan.
Bolat Manashuly Atabaev 1952 jyly Taldyqorǵan oblysyndaǵy Tentek aýylynda týǵan.
Nemis drama teatrynyń jáne Áýezov atyndaǵy qazaq drama teatrynyń bas rejisseri qyzmetin atqardy. "Aqsarai" teatrynyń jetekshisi boldy.
Ol óziniń alǵashqy rejisserlik jolyn Qaraǵandy oblysynyń Temirtaý qalasyndaǵy Nemis drama teatrynda spektakl qoiýdan bastaǵan. 1990 jyly Qazaq memlekettik akademiialyq drama teatryna aýysyp, B.Rimovanyń «Qos munlyq», M.Maqataevtyń «Qosh, mahabbat», I.Orazbaevtyń «Shyńǵys han», R.Muqanovanyń «Máńgilik bala beine», Á.Kekilbaevtyń «Abylai han», R.Muqanovanyń «Qaraly sulý», t.b. pesalaryna spektaklder qoidy.
2012 jyly Germaniia men Qazaqstan qarym-qatynasynyń damýyna qosqan úlesi úshin Gete medalimen marapattaldy.
2011 jyly batystaǵy bas kótergen jumysshylarǵa qoldaý kórsetti.
Bolat Atabaev pen marqum ánshi Madina Eralievanyń artynda uly Arsen Eraly qaldy.
