Gremmi syilyǵynyń iegeri, perýlik ataqty ánshi Eva Ailan Dimash Qudaibergendi kórý úshin óz kontsertin keiinge shegerip, Niý-Iorkke keldi, dep habarlaidy dimashnews.com saity.
Qos ánshi D. Qudaibergenniń Niý-Iorktegi kontserti aiasynda kezdesti. Eva Ailannyń aitýynsha, ol Dimashtyń ánin alǵash ret ómirindegi eń qiyn kezeńderdiń birinde tyńdaǵan. Anasy qaitys bolǵannan keiin aýyr kúizeliske ushyraǵan perýlik ánshiniń jabyrqaǵan kóńilin tipti, súiikti mýzykasy da kótere almaǵan. Osyndai qiyn ýaqytta ol Facebook-ten Dimashtyń «S.O.S» ánin oryndaǵan videosyn kózi shalǵan.
«Sol sátten bastap seniń ánińdi kún saiyn tyńdaimyn. Kúizelisten aryldym», - deidi Dimashqa aǵynan jarylǵan Eva Ailan.
Osy aptada ataqty ánshiniń kontserti ótýi tiis bolǵan eken. Alaida, qazaqstandyq jas talanttyń kontsertin tamashalaý úshin ony keiinge qaldyryp, Niý-Iorkke ushyp kelgen.
Dimashqa arnaiy daiyndap ákelgen syilyǵyn tabys etken Eva Ailan Perýde de qazaq ánshisiniń fan klýby óte belsendi ekendigin aitady. Olar D. Qudaibergenniń ánderiniń mán-maǵynasyn túsiný úshin óz tilderine aýdaryp, shyǵarmashylyǵynyń tanymaldyǵyn arttyrýda belsendi jumystar júrgizip jatyr eken.
Dimashtyń anasy Svetlana Aitbaeva da Eva Ailanǵa arnaiy syilyq tabystap, ulynyń shyǵarmashylyǵyna degen shynaiy súiispenshiligi úshin rizashylyǵyn bildirdi.
Eske salaiyq, D.Qudaibergenniń 10 jeltoqsanda Niý-Iorkte ótken jeke kontsertine álemniń 51 elinen jankúierler jinaldy. Olar ánshini Djon Kennedi atyndaǵy halyqaralyq áýejaidan Qazaqstannyń Týymen qarsy alǵan bolatyn.
