2017 jyldyń 25-27 shilde aralyǵynda elimizdiń aibyny – Qazaqstan Respýblikasy Ulttyq ulanynyń biyl qurylǵanyna 25 jyl tolý qurmetine orai vedomstvonyń Almaty oblysy Eńbekshiqazaq aýdany Qarakemer kentinde ornalasqan 6654 áskeri bóliminde áskeri bessaiystan respýblikalyq jarys ótti.
Atap aitar bolsaq, áýeli bessaiysymyz degen ne degen saýaldyń ózine ajyratyp alǵanymyz durys-aq. Bessaiys degenmiz ol Otan qorǵaýshylardyń arasynda keń taraǵan sporttyq shara, spartakiada. Onda sport túrleriniń bes túrinen jarys uiymdastyrylady. Onda AK-74 avtomatynan nysanany dáldep atýdan, kedergilerden júgirip ótýden, granata laqtyrýdan, júzýden jáne 8 shaqyrymǵa júgirýden jarysý túrleri engizilgen. Qarap otyrǵandaryńyzdai, bessaiystyń talaptary ońai emes, oǵan qatysýshyǵa asa jiti daiyndyq kerek.
Osy jolǵy sport sharasyna elimizdiń ár túpkirinen kelgen sportshy áskeri qyzmetshiler ózderiniń baptalǵan babyndaǵy tulpardai jarap turǵandaryn tanytty. Atap aitsaq, dúbirli dodaǵa Ulttyq ulannyń elimiz boiynsha tórt birdei óńirlik qolbasshylyǵynan jáne Petropavl qalasyndaǵy Áskeri institýtynan 6 birdei komanda qatysty. Alataýdyń tabiǵaty tunǵan mekeni Qarakemer kentine at basyn tiregen áskeri sportshylar kórermenge bir erekshe rýh pen jaqsy jarys órnegin syilai bildi.
Sharany ashqan Ulttyq ulan Bas qolbasshylyǵynyń sport jáne dene shynyqtyrý bóliminiń bastyǵy polkovnik Janbolat Ahmetov: «Jalpy, respýblikalyq jarys sharasy Qazaqstan Respýblikasy Ulttyq ulany Bas qolbasshylyǵynyń uiytqy bolýymen uiymdastyrylyp, Otan qorǵaý jolyndaǵy jaýyngerlik rýhty arttyrýǵa, elimizde sport túrlerin damytýǵa, salaýatty ómir saltyn nasihattaýǵa jáne kúsh-qýat qurylymdary qyzmetkerleriniń sporttyq sheberligin arttyrýǵa baǵyttalady», - dep atap ótti.
Biylǵy jyly osymen on besinshi márte ótkizilip otyrǵan dástúrli týrnirdiń ashylý saltanatynda qatysýshy komandalarǵa alǵys bildirip, sportshylarǵa sáttilik tilegen polkovnik J.Qurbanov: «Elimizdiń baǵy da, asyly ol memleketimizdiń Táýelsizdigi. Babalarymyz ǵasyrlar boiy ańsaǵan egemendikke qol jetkizgenimizge 25 jyl ýaqyt ótti. Osy ýaqyt aralyǵynda Elbasy Nursultan Nazarbaevtyń saliqaly saiasatynyń arqasynda ǵasyrlarǵa júk bolar taý-taý eńbek, ólsheýsiz tarihi mańyzdy ister atqaryldy. Bizdiń osy jylǵy ótkizip otyrǵan saiysymyzdy sol eldiktiń qorǵany, el aibyny – Ulttyq ulannyń biylǵy jiyrma bes jyldyq mereili toiyna qosqan az da bolsa úlesimiz dep bilemin. Jekpe-jek saiysy myqtylardyń saiysy. Osynda jinalǵan jigitterdiń osaly joq. Sizderdiń barlyqtaryńyzǵa da sáttilik tileimin», - dedi.
Eki kúnge sozylǵan tarlandar saiysynyń jeńimpazdar da anyqtaldy. Dodanyń kórigin qyzdyryp, qatarlaryna sportshylarydy jinaqtap kelgen «Shyǵys» óńirlik qolbasshylyǵynyń qurama komandasy komandalyq esepte birinshi oryndy oljalady. Al Áskeri institýttyń tarlandary ekinshi mejeden kórindi. Áskeri qyzmetshiler arasynan jeke esep Áskeri institýttyń ókili maior A.Kýlago men «Batys» óńirlik qolbasshylyǵynyń áskeri qyzmetshisi A.Terlikbaev ózderiniń shapshańdyqtaryn, shymyr da ikemdi, mergen de qaǵilez sportshylar ekendikterin tanytyp, kósh basyn bastady. Jeke kórsetkishter men komandalyq esepte top jarǵandar Bas qolbasshy Kýbogimen, diplomdarmen jáne baǵaly syilyqtarmen marapattaldy.
Maior Arman ÁÝBÁKIROV,
Almaty oblysy
