Keshe, 3 shilde kúni elordada «Habar» agenttiginiń tapsyrysymen túsirilgen «Bekzat» kórkem filminiń jabyq kórsetilimi ótti. Kartina Sidnei Olimpiadasynyń chempiony marqum Bekzat Sattarhanovtyń ómiri men sporttaǵy jetistigi týraly sýretteidi, dep habarlaidy "Ult aqparat".
Sharaǵa QR Aqparat jáne qoǵamdyq damý ministri Dáýren Abaev, Sport komitetiniń tóraǵasy Serik Sápiev, jýrnalister men blogerler, sportshylar men óner ieleri, sondai-aq akterler quramy qatysty. Bekzat Sattarhanovtyń ata-anasy bul kórsetilimge arnaiy Túrkistannan keldi.
«20 jyl ǵumyrynda qolynan kelgenshe eline barlyq kúsh-jigerin berip ketti. Bekzatqa qandai marapat, qandai kino shyǵarsa da artyq bolmas. Bekzatty jastardyń aldyna úlgi etip qoisa... onyń imandylyǵy, úlkendi syilaýy, qazaqylyǵy, birbetkeiligi, alǵa qoiǵan maqsatyn oryndaityn minezi qazirgi qazaq jastaryna kerek» - deidi Bekzat Sattarhanovtyń ákesi Seiilhan Sattarhanov.
Kartinanyń rejisseri - Murat Bidosov, stsenariiin Serjan Zakeruly jazǵan.
Filmniń siýjettik jelisinde Bekzat Sattarhanov ómiriniń úsh kezeńi qamtylady. Balalyq shaǵy, boz bala kezeńi jáne ómiriniń sońǵy sáti. 90 jyldardyń basyndaǵy qiyn-qystaý zamanǵa tap kelgen Bekzattyń balalyǵy kóp qiyndyqtarmen ótedi. Túrkistan qalasyndaǵy temir joldy boilai ornalasqan shaǵyn aýyldyń qarapaiym tirshiligi bala Bekzattyń kózimen beinelenedi. Onyń armany, namysqoi bitimi ár bir sátte synalyp otyrady.
Birde ata-anasy Bekzatty kúreske qatyssyn dep bapkerge aparady. Onda Bekzat óziniń sergektigimen kózge túsedi. Degenmen kúreske qatysqan balanyń boiy óspei qalady degen túsinikpen ony boksqa aýystyrady. Bapkerimen tanysqan kúnnen bastap, bul sport túrine erekshe mahabbaty ashylady. Kún saiyn erinbei jattyǵyp, alǵash ret Túrkistanda ótken saiysta jarqyrap kórinedi. Boz bala shaǵynda Germaniiada ótken týrnirde top jaryp, bapkerler olimpiadaǵa daiarlaý jattyǵýlaryna qabyldaidy. 1999 jyly Tashkentte ótken búkil Aziia birinshiliginde kúmis júldege ie bolyp, olimpiada oiyndaryna joldama alady. Solai 2000 jyly Sidneide tartysty oiyndar ótkizip, altyn medalǵa ie bolady.
Filmniń túsirilim jumystary Túrkistan, Almaty jáne Ystanbul qalalarynda ótken. Basty róldi jas akter Samat Ázimqulov somdady. Ol 2006-2007 jyldary kikbokstan jastar arasynda eki ret Qazaqstan chempiony bolǵan. Sonymen qatar týyndydan Ǵalymbek Ospanov, Murat Jarylqasynov, Maira Maqulbekova, Dýlyǵa Aqmolda, Qýanysh Muqatai, Baqdaýlet Shaimahan jáne basqa akterlerdi kóresizder.
Tolyq metrajdy kartina osy kúzde elimizdiń barlyq kinoteatrlarynda kórsetiledi dep josparlanyp otyr.
