Almaty qalasynyń bas sanitar dárigeri Jandarbek Bekshin oraza ustaýǵa niet etip júrgen adamdarǵa keńes berdi, dep habarlaidy Sputnik Qazaqstan.
"Qazaqstan musylmandary dini basqarmasy tótenshe jaǵdaidy eskerip, meshitte taraýih namazy oqylmaitynyn habarlady. Biz de osy sheshimdi tolyq quptaimyz. Namazdy árkim óz úiinde oqýy tiis jáne jeke gigienany saqtaýy qajet. Qoldy jii jýyp, jeke jainamazdy qoldanýy kerek", - dedi Bekshin.
Sonymen qatar qalanyń bas sanitar dárigeri qoǵamdyq oryndarda aýyzashar berýge tyiym salynǵanyn aityp ótti.
"Eger kim de kim musylman retinde óz mindetin oryndaǵysy kelse, onda jetkizý qyzmetin paidalanyp, óziniń dostary men tanystaryna tamaq bere alady. Ol tamaq oralǵan bolýy kerek jáne azyq-túlikti jetkizýmen ainalysatyn kompaniianyń qyzmetine júginýi qajet", - dedi ol.
Sonymen qatar Ramazan aiynda muqtaj jandarǵa qarjylyq kómek kórsetýge bolatynyn aitty.
"Azyq-túlikke muqtaj otbasyǵa kómek kórsetip, aýyzashar berýdi osyndai igi istermen almastyrýǵa bolady", - dedi ol.
Sondai-aq, Jandarbek Bekshin turǵyndarǵa jeke gigienany saqtap, qoldy jii jýýǵa, paidaly ónimdi qoldanýǵa keńes berdi.
