QR Densaýlyq saqtaý ministrligi Taýarlar jáne kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary – bas memlekettik sanitariialyq dáriger Jandarbek Bekshin elimizde ata-analar nelikten balalaryn infektsiialyq aýrýlarǵa qarsy vaktsinatsiiadan ótkizbeitinin aitty, dep habarlaidy QazAqparat.
«Ata-analardyń vaktsinatsiiadan bas tartýy máselesin bilemiz. Sondyqtan, olarmen jumys júrgizetin arnaiy jospar qurdyq. Bas tartýdyń sebebi nede? Bas tartyp jatqan ata-analardyń 40 paiyzy ózimizdiń pikirimiz, quqyǵymyz bar deidi. 35 paiyzy dini kózqarasyn alǵa tartady. 6 paiyzy vaktsinaǵa sengisi kelmeidi», - dedi Jandarbek Bekshin OKQ-da ótken baspasóz máslihatynda tilshilerdiń suraǵyna jaýap bere otyryp.
Onyń aitýynsha, BAQ kózderi arqyly vaktsinatsiialaýdyń qajettigi týraly nasihat jumystary árdaiym júrgizilip turady.
«Dini kózqarasy boiynsha bas tartatyndar bar. Kóbi ony bildirmei, óz quqyǵym degendi aitady. Resmi túrde 35 paiyzy – dini kózqarasyna bailanysty ekpeden bas tartatynyn aityp jatyrmyz ǵoi. Biraq, biz osy sebep boiynsha bas tartatyndardyń odan da kóp ekenin bilemiz. Sondyqtan, olarmen jeke-jeke jumys júrgizilip jatyr. Eń bedeldi otbasylardyń ókilderimen – ata-analaryna, ata-ájelerine túsindirý jumysyn qolǵa aldyq», - dedi ol.
Jandarbek Bekshinniń sózine sensek, Qazaqstanda salynatyn vaktsinanyń bári de Dúniejúzilik densaýlyq saqtaý uiymynyń sertifikattarymen alynady.
«Eń damyǵan eldiń vaktsinalary ákelinedi. Óz elimizde de ol qatań tekserýden ótedi. Ulttyq saraptama ortalyǵynda barlyq vaktsinalar saraptama men taldaýdan ótkiziledi. Jyl saiyn vaktsinatsiiadan bas tartýdyń 5 myń jaǵdaiy tirkeledi: Túsindirý jumystaryn júrgizgennen keiin ótken jyly 3,5 myń adam óziniń oi-pikirin ózgertti», - dedi ol.
