Foto: baq.kz
Atyraý oblysynyń prokýratýrasy Jaiyq-Kaspii basseinindegi ekologiia men bioártúrlilikti qorǵaý jumystarynyń kúsheitilgenin málimdedi, dep habarlaidy Ult.kz.
Negizgi qaýipterdiń biri – bekire tuqymdas balyqtar men olardyń ónimderiniń zańsyz ainalymy.
Qadaǵalaý organynyń dereginshe, brakonerlik kóbine zańsyz ónimdi satyp alatyndardyń suranysynan týyndaidy. Iaǵni, tek zańsyz aýlaýshylar ǵana emes, satyp alýshylar da bul tizbektiń bir bóligine ainalyp otyr.
2025 jyldyń qorytyndysynda óńirde ekologiia salasynda 30 quqyq buzýshylyq tirkelgen. Onyń ishinde 11 qylmystyq is sotqa joldanyp, 10 adamǵa aiyptaý úkimi shyqqan.
Prokýratýra eskertkendei, Qylmystyq kodekstiń 339 jáne 339-1-baptaryna sáikes, sirek kezdesetin janýarlardy nemese olardyń ónimderin zańsyz satyp alý, saqtaý, tasymaldaý jáne satý da qylmystyq jaýapkershilikke ákeledi.
Máselen, biyl Atyraý qalasynyń turǵyny 500 keliden astam bekire tuqymdas balyq saqtaǵany úshin 7 jylǵa sottaldy. Sondai-aq odan 304 million teńgeden astam shyǵyn óndiriletin boldy.
Qadaǵalaý organy kúmándi jolmen alynǵan balyq pen ýyldyryqty satyp almaýǵa shaqyrady. Óitkeni mundai áreket zań aldynda jaýapkershilikke ákelýi múmkin.
Aita keteiik, buǵan deiin Batys Qazaqstanda zańsyz balyq tasymaldaǵan kúdiktiler de ustalǵan.
