QR májilisiniń depýtaty Bekbolat Tileýhan "Nur Otan" partiiasy janyndaǵy quqyqtyq keńes otyrysynda quzyrly organ basshylaryna qoǵam alańdaýshylyǵyn jetkizdi.
Halyq qalaýlysy qazaqtyń qaimaǵy buzylmaǵan ońtústik óńirdegi bolǵan jaǵdaidy jantúrshigerlik oqiǵa dep atady.
"Jantúrshigerlik oqiǵa. Qazaqtyń qaimaǵy buzylmaǵan ońtústik óńiriniń Saryaǵashynda, onyń ishinde uly dana Abaidyń atyn iemdengen aýylda. Áńgimege arqaý Ózbekáli Jánibekov atyndaǵy mektepte oqityn ana súti aýzynan keppegen 7 jasar balanyń jaǵdaiy. Qoǵamnyń aiyptap jatqany – Júsip Balasaǵun atyndaǵy mekteptiń joǵary synyp oqýshylary jasady degen qulaq estip, kóz kórmegen sumdyq. Biz eldi-meken, mektepterimizge aiaýly tulǵalarymyzdyń esimin berippiz, ónegesin eskermeppiz. Jeti jasar balanyń ómirindegi tragediiaǵa jany túrshikpeitin qoǵamnyń ózinen de túrshigýge bolady. Biraq bul jaǵdaida azamattyq qoǵamnyń ainasy delinetin áleýmettik jeli durys reaktsiia berip jatyr", — dep jazdy Tileýhan feisbýktegi paraqshasynda.
Májilis depýtaty osy iske qatysy bar kináliler qatań jazalanýy kerektigin, pedofilge beriletin jaza kúsheitilýi tiistigin atap ótti.
"Qoǵam talaby qashan da eskerilgen. Kóptegen ózgeristerge qozǵaý bolǵan. Qalai degenmen, kinálary dáleldense, kim bolsa da, ádil jáne múmkindiginshe qatal jazasyn alýy tiis! Osyǵan aiaýshylyq jasap, jymyn bildirmei jaba salaiyq degen piǵyldaǵy adamnyń bári – sybailas, sony bilsin! Pedofiliiaǵa qatysty zańnamadaǵy jazanyń bárin kúsheitý kerek!", — dedi depýtat.
Tileýhan áleýmettik jeli búldirshinniń jaǵdaiyna alańdap, shýlap jatqanda, bilim jáne ǵylym ministrliginiń únsiz otyrǵanyna tańǵaldy.
"Aqparattyń kesirinen adam sanasynyń buzylǵany sondai, buryn qulaq estip, kóz kórmegen qylmystardyń kýási bolyp jatyrmyz. Zaǵipa Balieva Saryǵashtaǵy balanyń máselesi boiynsha ketti ǵoi. Biraq bir ókinishtisi, bir tańǵalatyn nárse – bilim jáne ǵylym ministrligi, ishki ister ministrligi nege úndemeidi? Búkil áleýmettik jeli shýlap jatqan kezde, ún-túnsiz qalyp otyrǵany adam tańǵalarlyq nárse. Mundai máselege beitarap qaraýǵa bolmaidy", — dedi Tileýhan.
Májilismen qoǵamda beleń alyp bara jatqan azǵyndyqqa kináli adamdardy jumystan bosatý arqyly tosqaýyl qoiý múmkin emes ekenin ashyna jazdy.
"Munda Aiagózdegi sý basýǵa alańdap jatyrmyz ǵoi, ol – tabiǵattyń isi, aityp kelmeitin apat edi. Al Saryaǵashtaǵy sumdyq – adamnyń isi, aitýǵa aýyz barmaityn aiýandyq edi. Bunyń túp-tamyryn qazsaq, árqaisymyzǵa tireledi. Jergilikti deńgeide synyp jetekshisi, mektep inspektory, mektep psihology, ata-ana, mektep basshysyn kinálarmyz. Ornynan keter, ornyna basqa adam keler, jaraidy. Biraq, memlekettik jastar ideologiiasynyń iiý-qiiýy shyqqanyn, qoǵamdyq uiattyń azaiǵanyn, kinodan sán, ánnen mán ketkenin mundai sheshimmen túzei almaisyz. Túzei almaimyz", — dedi ol.
