Bir partiiadan ekinshi partiiaǵa sekire beretin adam emespin, dep málimdedi májilis depýtaty Bekbolat Tileýhan. Bul týraly ol ulttyq qoǵamdyq senim keńesiniń ekinshi otyrysynyń qorytyndysy boiynsha ótken baspasóz máslihatynda aitty, - dep habarlaidy Sputnik Qazaqstan.
Buǵan deiin áleýmettik jelilerde depýtat Bekbolat Tileýhannyń kelini Toǵjan Qojalieva «Haq» partiiasyn qurǵaly jatyr degen áńgime taraǵan edi.
«On adam bolsa, on túrli pikir bolady. Ol meniń kelinim ekeni ras. Óziniń saiasi kózqarasy, ómirlik ustanymy bar. Biraq men bir partiiada júrip, ekinshi partiiaǵa sekire beretin adam emespin. «Nur Otan» partiiasynyń beldi múshesimin. Beldi múshesi ǵana emes, sol partiia gimniniń avtorymyn. Partiianyń tóraǵasy Nazarbaevtyń ustanǵan saiasatyn jalǵastyrýǵa, bylaisha aitqanda, sonyń nasihatshysy bolǵan adammyn» dedi Tileýhan.
Depýtat bir partiiadan shyǵyp, ekinshisine aýysý adamgershilikke de, saiasi mádenietke de jatpaitynyn atap ótti.
«Kelin degenimen, týǵan balam emes. Sosyn kelin túgili ishińnen shyqqan balań da tilińdi ala ma, almai ma, óziniń kózqarasy. Qazir sondai zaman, demokratiianyń zamany. Bireý taýar óndiremin deidi, bireý partiia quramyn deidi. Basqa qylam dep jatady. Onyń da kózqarasyna qurmetpen qaraý mindetimiz. Onyń da óz kózqarasy bar shyǵar. Biraq bul jerge kelgen kezde, bizdiń saiasi kózqarasymyz eki jaqqa ketip qalǵanyn jasyrmaimyn» dep aǵynan jaryldy ol.
