Bilim berý júiesinde elimizdegi ýniversitetter men mektepter ózin-ózi basqarý júiesine kóshýi tiis. Sonda talapqa sai jańa baǵdarlamalar júzege asyrylady. Aqtaýdaǵy halyqaralyq forýmǵa qatysqan Álihan Baimenov osylai dedi, dep habarlaidy "Ult aqparat".
Onyń aitýynsha, bilim júiesindegi ustaz ben shákirt adamzat órkenietiniń damýynda óte mańyzdy ról atqarady.
«Búgingi kúnniń ustazy jańa tehnologiialar zamanynda órkeniettik missiiasyn atqarýy úshin oǵan degen senim bolýy kerek. Onyń abyroiyn kóteretin qadamdar jasalýy tiis. Bizdiń bilim berý júiesindegi ýniversitetter men mektepter ózin-ózi basqarý júiesine kóshkeni jón. Sonda talapqa sai jańa baǵdarlamalar júzege asyrylady. Bilim ministrligi óz missiiasyn oqý oryndary men halyqtyń bilimge degen qajettiligin óteý dep belgileýi kerek. Bizdiń bilim berý júiesi osy baǵytta damysa, onda jańa tehnologiialardy da durys paidalanamyz. Sebebi jańa tehnologiialar – qural», - deidi Álihan Baimenov.
Al, túpki maqsat – bilikti, tárbieli, adamzattyń ortaq qundylyqtaryn boiyna sińirgen, eldi bolashaqqa bastap júretin maman tárbieleý.
«Mine, osy turǵydan alǵanda qanshama jańa tehnologiiany engizgenimen, qundylyqtar jáne orta qalyptastyrý máselesi tur. Basqarý júiesin ózgertý bir kúndik sharýa emes. «Batpandap kirgen mysqyldap shyǵady» degen sóz bar. Áli de bolsa muǵalim sabaq berip, bilim alýmen qatar túrli qaǵaz toltyrý, esep berýge kóp ýaqyt bóledi. Bul jumystar onyń kóp ýaqytyn, energiiasyn alady. Oqý oryndary da talai esep qujattaryn toltyrady. Rektordy, direktordy taǵaiyndadyńyz ba, oǵan senim bolýy kerek. Mysaly, elordadaǵy ministrliktegi inspektorǵa degen senim rektorǵa artylǵan senimnen joǵary bolmaýy kerek. Rektor muǵalimderge tolyq senip, ony jumys nátijesi boiynsha baǵalaýy tiis», - deidi Astana memlekettik qyzmet haby (ACSH) basqarýshy komitetiniń tóraǵasy.
