"Bailap, tańǵa deiin uryp-soqqan". Mańǵystaýda bopsalaý áreketi áshkere boldy

Mańǵystaý oblysynda ekstremizmge qarsy kúres departamenti qyzmetkerleri UQK departamentimen birlesip aqsha bopsalaǵan destrýktiv dini aǵym ókilderin ustady, - dep habarlaidy Tengrinews.kz tilshisi "Lada" basylymyna silteme jasap.

Óńirlik Politsiia departamentiniń baspasóz qyzmeti málimetinshe, ustalǵandar qarý qoldaný arqyly aqsha bopsalaýmen ainalysqan.

"Tórt adamnan quralǵan top jábirlenýshiden segiz million teńge talap etken. Aqtaýdaǵy jaldamaly páterge aparyp, bopsalaýshylar ony bailap, tańǵa deiin uryp-soǵyp, azaptaý úshin taiaq, pyshaq, tapansha qoldanǵan. Bári kameraǵa túsirilgen. Bul 13 qyrkúiekte saǵat 23:30-da bolǵan", - dep túsindirdi vedomstvo ókilderi.

"Kúdiktiler ustalyp, ýaqytsha ustaý izoliatoryna qamaldy. Barlyq zattai aiǵaq tárkilendi. Bul derekke qatysty "Bopsalaý" jáne "Zańsyz bas bostandyǵynan aiyrý" baptary boiynsha qylmystyq is qozǵaldy. Tórt jigit te psevdosalafit", - delingen habarlamada.