Parlament Májilisiniń jalpy otyrysynda «2004 jylǵy 22 jeltoqsandaǵy QR Úkimeti men RF Úkimeti arasyndaǵy «Baiqońyr» ǵarysh ailaǵynda «Báiterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratifikatsiialaý týral» zań jobasy maquldandy, dep habarlaidy QazAqparat.
«Zań jobasy «Báiterek» jobasyn iske asyrýdyń negizgi sharttaryn ózektendirýdi kózdeidi. Alǵashynda jobany «Angara» reseilik zymyrannyń negizinde iske asyrý josparlanǵan bolatyn. Biraq, «Angara» zymyrany ýaqytynda daiyn bolmaǵandyqtan, Taraptar jobany iske asyrýdyń kóptegen ártúrli nusqalaryn qarastyryp, taldaý jasady. Máseleni qosymsha pysyqtaýdyń nátijesinde Taraptar jobany «Soiýz-5» zymyrany negizinde iske asyrýdy sheshti. Jalpy alǵanda, Resei Federatsiiasy zymyrandy jasaý úshin jaýap beredi, al biz jerústi infraqurylymy úshin jaýap beremiz», - dep toqtaldy QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev.
Onyń sózine qaraǵanda, osy jobada Resei tarapy «Soiýz-5» zymyrandy, tehnikalyq jáne starttyq keshenderinde baqylaý-tekserý jabdyqtaryn qurýdy, sondai-aq údemeli bloktyń tehnikalyq keshenin, ǵarysh apparatyn jáne ǵaryshtyq bastiek bóligin jańǵyrtýdy qamtamasyz etedi. Osy jumystar 916 mln AQSh dollary somasynda baǵalandy. Jańǵyrtý maqsatynda 2018 jyly «Baiqońyr» ailaǵynyń 42,43 jáne 45-shi alańdarynda ornalasqan «Zenit-M» kesheniniń 243 nysany Qazaqstan tarapyna berildi.
«Qazaqstan tarapy «Zenit-M» kesheniniń jerústi infraqurylymy nysandaryn qaita jańartý men jańǵyrtýdy jasaidy. Starttyq jáne tehnikalyq keshenderdi jańǵyrtý, jumys istep turǵandaryn kúrdeli jóndeý jáne qaita jańartý, sondai-aq jerústi ǵarysh infraqurylymynyń jańa obektilerin salý jumystary júrgiziletin bolady. Osy jumystar 233 mln AQSh dollarymen baǵalanady. Jerústi keshenin jańǵyrtý jáne qurylys jumystary kezinde qazaqstandyq kompaniialardy barynsha tartý josparlanady, ol qosymsha jumys oryndaryn beredi. «Báiterek» ǵarysh zymyran keshenin iske qosý - «Baiqońyrdy» eń belseńdi ǵarysh ailaǵy retinde saqtaýǵa múmkindik beredi. Zań jobasyn qabyldaý Qazaqstan Respýblikasynyń qoldanystaǵy zańnamasyna qaishy kelmeidi, sondai-aq Qazaqstan Respýblikasy men Resei Federatsiiasy arasyndaǵy «Baiqońyr» kesheni boiynsha strategiialyq áriptestik pen ekijaqty yntymaqtastyqty odan ári nyǵaitýǵa yqpal etedi», - dedi Asqar Jumaǵaliev.
