«Baiqońyr» kesheni boiynsha jetinshi úkimetaralyq komissiianyń jumysy qorytyndylandy, dep habarlaidy "Ult aqparat" Úkimettiń saityna silteme jasap.
Búgin Qazaqstan Respýblikasy Premer-Ministriniń orynbasary Roman Skliar men Resei Federatsiiasy Premer-Ministriniń orynbasary Iýrii Borisovtyń tóraǵalyǵymen ótken jalpy otyrysta «Baiqońyr» kesheni boiynsha jetinshi úkimetaralyq komissiia jumysynyń qorytyndysy shyǵaryldy.
Kelissóz barysynda taraptar «Baiqońyr» keshenin birlesip paidalaný jáne odan ári damytý perspektivalaryna, sondai-aq Baiqońyr qalasynyń tirshilik deńgeiin jaqsartýǵa qatysty Qazaqstan-Resei yntymaqtastyǵynyń aǵymdaǵy baǵyttaryn talqylady.
Úkimetaralyq komissiia músheleri «Báiterek» ǵaryshtyq zymyran keshenin qurýdyń birlesken jobasyna erekshe nazar aýdardy, sharalar tizbesi men júzege asyrý merzimderi belgilendi. Keshen múlkin utymdy paidalaný, infraqurylym men áleýmettik salany jańǵyrtý mindetteri de qarastyrylǵan.
Jiynǵa qatysýshylar aimaq pen ǵarysh ailaǵynyń ekologiialyq qaýipsizdigin arttyrýdyń mańyzdylyǵyna, keshenniń paidalanylmai turǵan nysandaryn jalǵa berýden shyǵarý, esepten shyǵarý jáne kádege jaratý máselelerine jeke-jeke toqtaldy.
Kún tártibindegi máseleler boiynsha sarapshylar ózara qolaily sheshimder tapty, bul ÚAK otyrysynyń hattamasynda kórsetilgen.
Kezdesý sońynda taraptar ózara is-qimyldyń joǵary deńgeiin jáne «Baiqońyr» kesheniniń strategiialyq baǵyttaryndaǵy mindetterdi tabysty júzege asyrý úshin qajetti áleýettiń bar ekenin atap ótti.
