AQSh prezidenttigine jaqynda sailanǵan Djo Baiden kongresti koronavirýs boiynsha halyqqa kómek kórsetý týraly zańdy jedeldetip qabyldaýǵa shaqyrdy. Onyń aitýynsha, eldegi jumyssyzdyq deńgeii týraly jańa málimet ekonomikany qalpyna keltirý protsesiniń kibirtiktegenin ańǵartady.
"Qazir áreket etpesek, bolashaǵymyz tym bulyńǵyr bolmaq. Amerikalyqtarǵa kómek kerek jáne olar dál qazir kómekke zárý. Ári olar keler jyly bizden taǵy járdem kútedi" dedi Baiden 4 jeltoqsanda.
Osy kúni shyqqan úkimet esebine sáikes, qarashada AQSh-taǵy eńbek naryǵy taryla túsken. Baiden jýrnalisterge koronavirýs indetine bailanysty 908 mlrd dollar qarjy jumsaýdy kózdeitin zańdy qoldaitynyn aitty. Bul zań jobasy qazir kongreste talqylanyp jatyr.
Ol qyzmetine kirisken soń kómekti ulǵaitý boiynsha kongreske qysymdy kúsheite túsetinin jetkizdi. Onyń aitýynsha, qazir qaralyp jatqan zań – amerikalyqtarǵa beriletin járdemniń basy ǵana.
Baiden "halyq bul járdemge asa qatty muqtaj bolyp otyrǵandyqtan", kongrestegi respýblikalyqtar men demokrattardy ony qoldaýǵa shaqyrdy.
Zań jobasy mekemelerge, jumyssyzdarǵa, mektepter men densaýlyq saqtaý uiymdaryna járdemaqy bólýdi qarastyrady. AQSh-ta osyndai járdemaqy týraly alǵashqy zań naýryzda qabyldanǵan.
Delaver shtatynyń Ýilmington qalasyndaǵy úiinde jýrnalisterge suhbat bergen Baiden qazir shtattarda óndiriske ruqsat alyp jatqan koronavirýs vaktsinasyna qatysty pikirin de bildirdi. Ol vaktsina salýdy mindetteýdi quptamaitynyn, halyqtyń oǵan senimi birtindep artady dep úmittenetinin aitty.
Sailaý naýqany kezinde ol indetti toqtatý – prezident retindegi basty jumysy bolatynyn aitqan.
Baiden óz inaýgýratsiiasy qalai ótetini týraly da oiymen bólisti. Onyń aitýynsha, shara kezinde adamdardyń qaýipsizdigi basty nazarda bolady.
"Meniń eń basty mindetim – amerikalyqtardyń qaýipsizdigin saqtai otyryp, merekeleýge múmkindik berý" dedi Djo Baiden. Ol AQSh astanasynda dástúrli parad ótpeitinin jáne óte kóp adam jinalǵan shara bolmaitynyn, kei sharanyń virtýaldy túrde uiymdastyrylatynyn eskertti.
Qarashanyń basyndaǵy sailaýda jeńiske jetken Demokratiialyq partiia ókili Djo Baiden keler jyly 20 qańtarda prezident qyzmetine kirisýi tiis. Ázirge ol ákimshiligindegi basty oryndarǵa kimderdi taǵaiyndaitynyn tolyq anyqtaǵan joq. Bilik tranziti boiynsha ókil Djennifer Psakidiń aitýynsha, Baiden aldaǵy aptada ákimshiligindegi jańa laýazymdarǵa taǵaiyndalatyn adamdardyń aty-jónin ataidy.
Dodada jeńilis tapqan qazirgi prezident Donald Tramp sailaý nátijesin áli moiyndaǵan joq.
