Baýyrjan Baibek otandyq birqatar saiasattanýshylar, sarapshylar, qoǵam qairatkerleri jáne basqa da belsendi qazaqstandyqtar qurǵan «Nur Otan» partiiasy Jaqtastarynyń ligasymen kezdesti. Kezdesý barysynda táýelsiz birlestikterdiń, onyń ishinde óńirlerden kelgen 50-den astam ókili óz suraqtaryn qoiyp, «Nur Otan» partiiasynyń praimerizin uiymdastyrý boiynsha usynystaryn ortaǵa saldy.
UQSK-niń múshesi, Eýraziialyq integratsiia institýtynyń basshysy Erlan Sairovtyń aitýynsha, búginde búkil álemde adamdardyń túrli saiasi institýttarǵa degen senimi tómendep ketken. «Nur Otan» jańa jáne belsendi adamdarǵa arnalǵan partiialyq «áleýmettik lifttiń» naqty tetigin iske qosý arqyly óziniń halyqtyq partiia ekenin kórsetip otyr.
«Nur Otan» praimerizi – bul jalpy eldiń saiasi júiesin ózgertýdegi mańyzdy qadam ekenine senimdi bolǵandyqtan da, biz birigýdi jón kórdik. Partiianyń Jaqtastar ligasy praimerizdiń ashyq jáne adal ótkizilýine qoǵamdyq baqylaý jasaidy. Búkil el oń ózgeristerge múddeli», - dedi ol.
Óz kezeginde Baýyrjan Baibek praimeriz Elbasy, Partiia Lideri Nursultan Nazarbaevtyń bastamasymen qolǵa alynǵan partiia jumysyn «qaita jandandyrý» baǵdarlamasynyń negizgi kezeńderiniń biri jáne Memleket Basshysy Qasym-Jomart Toqaev jariialaǵan «Halyq únine qulaq asatyn meleket» tujyrymdamasynyń naqty iske asyrylýy ekenin eske saldy.
«Biz partiiaǵa praimeriz arqyly túiitkildi máselelerdi ashyq aityp, ony sheshý joldaryn usyna alatyn qoǵamnyń senimi men qoldaýyna ie bolǵan bedeldi, adal jáne kópshil adamdardyń kelgenin qalaimyz. Árbir oryn úshin básekeli kúres kútip tur. Sondyqtan kandidattar óńirdi, aýdandy, aýyldy damytý týraly kózqarasyn usynyp, ózine daýys berýge sendirýi qajet. «Praimeriz» aqparattyq júiesi onlain rejiminde úgit-nasihat júrgizýge jáne daýys berýge múmkindik beredi. Adamdar bir ret qana basý arqyly saiasi protseske qatysa alady», - dep atap ótti partiia Tóraǵasynyń birinshi orynbasary.
Qaraǵandydan kelgen qoǵam qairatkeri Áliia Sadyrbaeva «Nur Otan» praimerizi buǵan deiin oǵan kúmánmen qaraǵan belsendi azamattardy partiia qataryna tartýǵa múmkindik beretinin aitty.
«Meniń qyzmetim qoǵamdyq jumyspen, túrli sanattaǵy adamdarǵa kómek kórsetýmen bailanysty. 2016 jyly adamdardyń túiitkildi máselelerin tiimdi sheshýge múmkindik beredi degen úmitpen partiia qataryna qosyldym. Biraq formalizmdi, syrǵyta salýdy, nátijesi joq is-sharalardy kórgennen keiin men partiia qatarynan shyǵýǵa sheshim qabyldadym. Biraq qazir «Nur Otan» shynymen ózgerip jatqanyn kórip otyrmyn. Áielder men jastar úshin jaǵdai jasalýda. Sondyqtan praimerizge qatysýǵa ótinish berdim. Ózimdi mysalǵa keltire otyryp, sybailas jemqorlyqtan sharshap, áleýmettik ádiletsizdikten kóńili qalǵan adamdarǵa qarapaiym adam úshin depýtat bolý jáne bir nárseni ózgertý múmkin ekenin kórsetkim keledi», - dedi Áliia Sadyrbaeva.
Kezdesý barysynda óńirlerden kelgen qatysýshylar praimerizge qatysýshylarǵa qysym jasaý jáne kedergi keltirýi múmkindigi máselesin qozǵady.
«Eger úmitkerlerge kedergi jasaǵan nemese burmalaý faktilerin anyqtasaq, onda biz sol ýchaskedegi nátijelerdi joiyp, tiisti uiymdastyrý sharalaryn qoldanamyz. Ol úshin arnaiy jedel jeli qurdyq, baiqaýshylar bolady. Eń bastysy, qysym kórsetý faktisin boldyrmaý úshin daýys berý qupiia ótedi. Kóbinese aýyldyq jerlerde, shalǵai aýdandarda adamdar túiitkildi máselelerdi ashyq aitpaidy. Óitkeni, olar sol máseleni sheshý úshin qandai da bir is-áreket jasalatynyna senbeidi. Praimeriz jaǵdaidy túbegeili ózgertetini anyq. Bul – elektiń bir túri, shyn kóshbasshylardy, ózi turatyn óńirdi óte jaqsy biletin, naǵyz óz isiniń bilgirlerin anyqtaityn tiimdi tetik. Depýtat bolǵannan keiin, ol partiianyń sailaýaldy baǵdarlamasynyń oryndalýyn naqty qadaǵalap, elektoratpen bailanysyn úzbeýi kerek. Áitpese, onyń ornyna basqa bireý keledi», - dep atap ótti Baýyrjan Baibek.
Beinekonferentsiia barysynda saiasattanýshy Marat Shibýtov Almatyda praimerizge qoǵam úlken qyzyǵýshylyq tanytyp otyrǵanyn atap ótti.
«Nur Otan»-nyń keibir qarsylastary bileýshi partiia belsendilerdi óz qataryna qosyp alýdy kózdeidi degen jeleýmen adamdardy praimerizdi elemeýge úgitteýde. Biraq biz mundai úgittiń kerisinshe áser etetinin kórip otyrmyz. Óitkeni bul – sailanýshy organdarǵa kirýdiń naqty múmkindigi ekenin bári túsinedi. Almatyda tirkeý bastalǵan bir-eki kún ishinde bir orynǵa eki adamnan talasýda. Al olardyń 38%-y áielder. Iaǵni, kvota áielderdi saiasi protsesterge tartýdyń pármendi tetigi bolyp tur», - dedi Marat Shibýtov.
Kezdesý sońynda Baýyrjan Baibek partiia Lideri Nursultan Nazarbaevtyń partiiaishilik irikteýge erekshe mán berip otyrǵanyn atap ótti. Partiia Tóraǵasy praimerizdiń bastalýyna bailanysty arnaiy úndeý joldady.
«Partiia jumysyn «qaita jandandyrý» praimerizben aiaqtalmaidy. Ol endi ǵana bastalady. Ózderińizge málim, eger buryn partiia sailaýǵa jalpy respýblikalyq bir sailaýaldy baǵdarlamamen baratyn bolsa, qazir Elbasynyń tapsyrmasyna sáikes biz 216 óńirlik sailaýaldy baǵdarlamanyń jobalaryn ázirledik. Partiia Tóraǵasynyń tapsyrmasy boiynsha olardy jariialap, kraýdfanding ádisin qoldanýdy josparlap otyrmyz. Usynystarǵa, syndarly synǵa ashyqpyz jáne qoǵamnyń júielik ózgeristerge degen suranystaryna jaýap berýge ázirmiz», - dedi «Nur Otan» partiiasy Tóraǵasynyń birinshi orynbasary.
