«Nur Otan» partiiasy tóraǵasynyń birinshi orynbasary Baýyrjan Baibek aldaǵy ýaqytta partiia zaman talaptaryna sai ózgerip, naqty reformalar qolǵa alynatyny týraly aitty, dep habarlaidy "Ult aqparat".
«Habar» agenttiginiń «Jeti kún» baǵdarlamasyna bergen suhbatynda Baýyrjan Baibek 21 tamyzda ótken Saiasi keńestiń keńeitilgen otyrysynda Elbasy bergen tapsyrmalardyń mańyzy, partiiany qaita jandandyrý jolyndaǵy jańa baǵdarlama jáne partiia jumysynyń aldaǵy baǵyt-baǵdary týraly baiandady.
«Elbasy Saiasi keńestiń otyrysynda «Senim. Dialog. Bolashaqqa nyq qadam – «Nur Otan» partiiasynyń 7 serpini» atty jańa baǵdarlamany tanystyryp, bileýshi partiiaǵa naqty tapsyrmalar berdi. Olardyń eń bastysy – partiia jumysyn jandandyrý. Qazir jaǵdai jaqsardy. Soǵan bailanysty qoǵamnyń suranysy da ózgerdi. Biz osy suranystarǵa sai bolyp, halyqtyń senimin aqtaý úshin jumys isteimiz. Sondyqtan bizdiń negizgi jańa quralymyz – praimeriz, iaǵni kez kelgen máseleni ashyq, ádil talqylaý», – dedi Baýyrjan Baibek aldaǵy ýaqytta partiia zaman talaptaryna sai ózgerip, naqty reformalar qolǵa alynatynyn aitty.
Onyń aitýynsha, Elbasy anyqtap bergen 7 baǵyt arqyly partiia jumysyn qaita jandandyrý aiasynda jastarǵa, ásirese, aýyl jastaryna jaǵdai jasaý, aýyldy jerlerde jumys oryndaryn ashý, iri qalalarǵa kóshken azamattarǵa qoldaý kórsetý, kóp balaly ana, múmkindigi shekteýli azamattar, basqa da áleýmettik toptarǵa naqty kómek kórsetý, bastaýysh partiia uiymdarynyń jumysyn jetildirý, partiialyq baqylaýdy kúsheitý siiaqty kóptegen ózekti máseleler boiynsha da jumystar júrgiziledi. Sondai-aq Baýyrjan Baibek búginde partiianyń aldyna qoiylyp otyrǵan talaptarǵa Májilis pen barlyq deńgeidegi máslihattardaǵy fraktsiialardyń músheleri, nurotandyq ministrler men ákimder de sai bolýy kerektigin aitty.
«Elbasy «Nur Otan»-dy naqty isterdiń partiiasy dep únemi aityp keledi. Sondyqtan biz bileýshi partiia retinde eń aldymen ashyq, ádil bolýdy ózimizden talap etemiz. Biz bir-birimizden el úshin naqty ne istegenimizdi suraýymyz kerek. Osyny ár partiia qyzmetkeri sezinýi tiis. Sol sebepti aldaǵy ýaqytta óz qatarymyzdy tazartýǵa basa mán beremiz, – dedi «Nur Otan» partiiasy Tóraǵasynyń Birinshi orynbasary.
Sonymen birge ol budan bylai partiianyń qoǵamdaǵy bar máselelerdi jasyrmai, ashyq aitatynyn jetkizdi.
«Eger bir másele oń sheshimin tapsa nemese sońyna deiin jetkizilmese, sonyń bárin halyqqa jariialap otyramyz. Qazaqta «aýrýyn jasyrǵan óledi» degen sóz bar. Sondyqtan partiia bar kemshilikterdi der kezinde kóterip, aitý kerek. Elbasy «Nur Media» holdingine naqty tapsyrma berdi. Ol jalpy BAQ-qa da qatysty. Otandyq aqparat quraldary shyndyqty aitýlary kerek. Biraq synnyń destrýktivti jáne konstrýktivti degen eki túri bar. Iaǵni, adam tek synai bermei, máseleniń sheshilý jolyn da aitýy tiis. Sonda ǵana ondai synnyń halyqqa paidasy bolady. Al qur sózben esh nársege jete almaimyz», – dedi ol.
Suhbat kezinde partiianyń halyqty masyldyq psihologiiadan aryltyp, eńbek etýge úgitteý isinen de tys qalmaityny sóz boldy.
«Elbasy únemi halyqty adal eńbek etýge shaqyryp keledi. Bul – qoǵamda ádildiktiń ornaýyna da úlken áserin tigizedi. Sondyqtan adam ózi únemi alǵa umtylyp, talpynýy kerek. Kásippen ainalysamyn degenge memleket te qoldaý kórsetip otyr. Partiia da osy iske atsalysyp, túsindirý jumystaryna qatysady. Bizdiń maqsatymyz – halyqqa balyq emes, qarmaq berý», – dedi Baýyrjan Baibek.
Budan basqa partiia tóraǵasynyń birinshi orynbasary aitys óneri, tól mádenietimizdi dáripteý siiaqty mańyzdy salalarǵa erekshe toqtalyp, bul baǵytta partiia aýqymdy jumystar júrgizetinin aitty.
«Elbasy táýelsizdik alǵaly beri aitysty qoldap kele jatyr. Aitys bizdiń salt-dástúrimizdiń ajyramas bir bóligi. Ol da praimeriz siiaqty. Sebebi ol jerde ashyq syn aitylyp, eldiń sózin sóilegen eń myqty aqyn jeńiske jetedi. Partiiada praimerizder solai ótýi kerek. Óitkeni partiia naǵyz demokratiialyq institýt. Sondyqtan ishki partiialyq demokratiia qalyptasyp, túrli pikirler aitylýy tiis. Sol sebepti partiia aldaǵy ýaqytta barlyq máseleni ashyq talqylaityn bolady, – degen Baýyrjan Baibek «Nur Otan»-nyń halyqtyq partiia ekenin, sondyqtan halyqtyń sózin sóilep, muńyn muńdap, azamattardyń ne nársege muqtaj ekenin bilý, eldiń arasynda júrip, etene jumys isteý partiialyqtardyń basty mindeti ekenin jetkizdi.
Sondai-aq ol aitysker bolý úshin talant pen darynnan bólek jan-jaqty bilim de kerek ekenine toqtaldy.
«Aitysker bolý úshin talant kerek. Sonymen birge bilim men mádeniet te qajet. Sondyqtan partiia aitys óneriniń damýy úshin aityskerlermen jumysqa da basa mán beredi», – dedi Baýyrjan Baibek.
Áńgime barysynda ulttyq rýh máselesi de nazardan tys qalǵan joq. Bul jóninde partiia Tóraǵasynyń Birinshi orynbasary ulttyq rýhy osal halyqtyń eshqandai biikke kóterile almaitynyn aitty.
«Elbasymyz únemi osy máselege basa mán berip, barlyq jaǵdaidy jasap keledi. Tuńǵysh Prezidentimiz bul iste kóbine Japoniianyń tájiribesin mysalǵa keltirip otyrady. Kezinde alashordalyqtar da salt-dástúr men jańa tehnologiiany ushtastyryp, eki jaqtyń ozyq tustaryn qatar alyp júrý kerektigin aitqan edi. Sol sebepti biz ózimizdiń jaqsy, zaman talabyna sai ulttyq qundylyqtarymyzdy saqtap, qorǵap, olardy bolashaqtyń talaptarymen úilestire damytýymyz kerek. Al kemshin tustarymyzdan bas tartýdan qoryqpaýymyz qajet», – dedi Baýyrjan Baibek.
Sondai-aq ol 2013 jyly qabyldanǵan «Nur Otan» partiiasynyń doktrinasyna toqtalyp ótti.
«Partiiamyzdyń doktrinasynda tól mádenietimizdi, rýhaniiatymyzdy damytý máseleleri ashyq aitylǵan. Bul – biz úshin asa mańyzdy. Sebebi qazirgi tańda qoǵamdaǵy keibir máseleler osy saladaǵy olqylyqtardan bolyp otyr. Sonyń ishinde eń aldymen otbasylyq qundylyqtarymyz álsirep ketti. Sondyqtan aldaǵy ýaqytta partiia osy baǵyttaǵy jumystardy qolǵa alady», – dedi partiia tóraǵasynyń birinshi orynbasary.
