Almaty ákimi Baýyrjan Baibek Atakentke alyp tiindi ornatýdyń sebebin túsindirip berdi, dep habarlaidy QazAqparat tilshisi.
Almatylyq ustazdardyń tamyzdaǵy jiynynda sóz alǵan ákim alyp tiin taqyrybyna toqtalyp ótti.
«Qala kórkin ajarlandyra túsken saiyn mádeni interventsiiaǵa jaqyndaimyz. Almatynyń ár túkpirinde baiqaý túrinde 16 artobekt qoiyldy. Qala bolashaǵyn álemdik deńgeige kóterýde amerikandyq kompaniiamen jumys istep jatyrmyz. Biznestiń eń damyǵan túri - týrizm. Dálirek aitsaq, mádeni, event-týrizm. Bul elimizge mol tabys ákeledi. Qala týraly aitý kerek, ony álemge tanytý kerek. Dúniejúzinde memleket kelbetine ainalǵan 600 qala bar. Qazaqstannan jalǵyz Almaty osy tizimge engen», - dedi ákim.
Onyń aitýynsha, Almaty týraly álemdik deńgeide aitylý kerek. Sonyń aiqyn dáleli - tiin tóńireginde qyzǵan pikirler.
«Alyp músinniń baǵasyna keler bolsaq, 23 million teńgeniń 15 milliony ǵana qala biýdjetinen bólingen. Álemdik ólshemge súiensek, bul asa qymbat ónim emes. Tiindi jasaǵan avtordyń sózinshe, onyń osyǵan uqsas shyǵarmasy Shanhaidaǵy «Túlki» 100 myń dollarǵa túsken. Onyń kólemi bizdiń tiinnen eki ese kishkentai. Ótkende bir aqparat oqydym, úndi músinshisi Alish Kopýrdyń bolattan quiylǵan 10 metrlik buiymy million dollarǵa baǵalanǵan. Mundai mysaldar óte kóp», - dedi ol.
«Bizdiń obektige jumsalǵan shyǵyn óteldi deýge bolady. Nege deseńiz, tiin týraly álemdik BAQ jarysa jazdy. Onyń ishinde VVS, New Yourk Post, Fox News bar. Buǵan kórshi Resei men ózimizdiń mass-medianyń shýlaǵanyn qosyńyz. Tiinge tókken tiynǵa osynsha aqparattyq dúmpý kótere almas edik. Endi elge kelgen týrister birinshi kezekte tiindi kórýge asyǵady. Qazaqstannyń ózge óńirlerinen Almatyǵa qydyryp kelgen qonaqtar endi Shymbulaq pen Medeý úshin emes, atyshýly tiin úshin keledi.
Qala basshysynyń paiymdaýynsha, tiin almatylyqtardyń jańa qubylysty qabyldai bilýine, alǵa jyljýyna yqpalyn tigizbek.
«Tiin - móldir sý, taza aýa, jasyl jelek. Men - almatylyqpyn. Buryn munda tiin kóp bolatyn. Ol tiri tabiǵatta ǵana ómir súredi. Naǵyz Almatynyń janýary. Avtordyń negizgi oiy da osynda jatyr. Atakent kezinde halyq sharýashylyǵy jetistiginiń kórmesi bolǵan, jasyl aimaq, almaly baq edi. Sońǵy 10 jyldyqta onyń jaǵdaiy ne boldy? Úlken avtoturaq pen bazar aimaǵyna ainaldy. Biz buǵan únsizdik tanyttyq», - dedi qala ákimi Baýyrjan Baibek.
