Batys óńirlerde tehnikalyq mamandyq granttarynyń sany artady. QR Premer-Ministri Álihan Smaiylov Úkimet otyrysynda osyndai tapsyrma berdi, dep habarlady QazAqparat.
«Áleýmettik blok boiynsha. Birinshi, Eńbek ministrligi jumysqa ornalastyrýdy jáne áleýmettik qoldaýdy qajet etetin azamattardyń naqty sanyn anyqtap, eńbek salasyn sapaly jańartý jumysyn júrgizsin. Múddeli memlekettik organdarmen birlesip, biznes-ideialardy iske asyrýǵa arnalǵan granttar men eńbekaqy mólsherin ulǵaitý, «Jastar praktikasyna», «Alǵashqy jumys orny» jobasyna qatysý merzimin arttyrý boiynsha sharalar qabyldasyn. Ulttyq ekonomika jáne Eńbek ministrlikteri bir ai merzimde «Halyq tabysyn arttyrý» baǵdarlamasynyń jobasyn ázirlep Úkimetke engizsin», - dedi Premer-Ministr.
Al Bilim ministrligine múddeli memlekettik organdarmen birlesip, muǵalimder jetpeitin óńirlerge ustazdardy tartý baǵdarlamasyn ázirlep, olardy tiisti áleýmettik qoldaý sharalaryn qarastyrý júkteldi.
«Buǵan qosa bedeldi sheteldik joǵary oqý oryndarynyń bes filialyn onyń ekeýin Batys óńirde ashý sharalaryn qabyldasyn. Sondai-aq, memlekettik bilim berý tapsyrysynyń jobasynda birinshi kezekte Batys óńirlerde tehnikalyq baǵyttar boiynsha granttar sanyn arttyrý qajet. Halyq tyǵyz qonystanǵan óńir jastarynyń joǵary oqý oryndarynda bilim alýy úshin nysanaly grattardy kózdeý qajet», - dedi Úkimet basshysy.
Sondai-aq, ol «Qazaqstan halqyna» qory qashan qurylatynyn aitty.
«Úshinshi, Densaýlyq saqtaý, Bilim, Mádeniet, Qorǵanys, Qarjy, Ulttyq ekonomika ministrlikteri 1 aqpanǵa deiin «Qazaqstan halqyna» qoǵamdyq áleýmettik qoryn qurý máselesin qarastyrsyn. Búgingi jaǵdaidyń qanshalyqty kúrdeli ekenin bárińiz bilip otyrsyzdar. Barynsha bir kisidei jumylyp, úilesimdi jumys isteýimiz qajet. Orynbasarlarym óz salasy boiynsha jáne memlekettik organdardy naqty úilestirý men baqylaýdy uiymdastyrsyn», - dedi Álihan Smaiylov.
