Foto: Abai oblysy ákimdiginiń baspasóz qyzmeti
Batys Qazaqstan oblysynda evakýatsiialanǵan aýyl turǵyndaryn búgin qaitadan qaýipsiz aýmaqqa shyǵarýǵa týra keldi, dep habarlaidy «Ult aqparat» «Moi gorod» portalyna silteme jasap.
Bir kún buryn Batys Qazaqstan oblysy tótenshe jaǵdailar departamenti Terekti aýdanyndaǵy Uzynkól sý qoimasyna egis alqaptarynan tym kóp sýdyń kelgenin habarlady. Sonyń saldarynan sý qoimasy tolyp ketý qaýpi týyndady. Qutqarýshylar turǵyndardy aldyn ala evakýatsiialaýǵa kiristi. Sodan keiin Uzynkól, Iýbileinyi, Kemer, Jańa ómir jáne sý qoimasynan tómen ornalasqan Barbastaý aýyldaryna sý basý qaýpi tóndi.
"Jalpy 705 adam evakýatsiialandy, onyń ishinde 230 bala bar. Evakýatsiialaý kezinde 112 adam men 39 tehnika jumyldyryldy. Qazir bógetti nyǵaitý jumystary júrgizilýde. Sý qoimasy jarylǵan jaǵdaida bes aýyldy sý basý qaýpi saqtalady. Erigen qar sýy basyldy, evakýatsiialanǵandar úilerine qaityp jatyr", - dep habarlady Batys Qazaqstan oblysynyń tótenshe jaǵdailar departamenti.
Alaida Uzynkól aýylynyń turǵyndary aýyldastarynyń birazy úilerine keshe qaitsa, birazy úilerine búgin kelgenin aitty.
"Jańa qaityp keldik, sý aýylǵa jetip, kóterilip jatyr. Shettegi kóshege kirip te ketti. Eń qyzyǵy, bizdi qaitadan kóshirip jatyr. Bálkim bóget buzylǵan shyǵar", - deidi Uzynkól turǵyny.
Aýylda evakýatsiia taǵy bastaldy degen aqparatty aýyldyq okrýg ákimdigi rastady. Bóget buzylǵan joq, dep habarlady ákimdik, sý qoimasyna sý quiylyp, sý Uzynkól aýylyna jetken.
