Batys Qazaqstan oblysyndaǵy Qarasý toǵanynda 3 tonnadan asa balyq "otteginiń jetispeýinen" qyrylyp qalǵan. Bul týraly orman sharýashylyǵy jáne janýarlar dúniesi komitetiniń baspasóz hatshysy Sáken Dildahmet habarlady.
5 sáýir kúni jelide Qarasý toǵanynda jappai balyq qyrylyp qalǵany aitylatyn video paida bolǵan.
Dildahmettiń habarlaýynsha, 3,15 tonna balyq qyrylǵan.
"Qyrylǵan balyq túri - taban. Ólgen balyqtardyń kózi joiyldy. Aldyn ala derek boiynsha, balyqtardyń qyrylýyna sýdaǵy ottegi tapshylyǵy sebep" deidi ministrlik ókili. Onyń aitýynsha, toǵanda mundai jaǵdai eki jyl buryn kóktemde bolǵan.
Ministrlik ókiliniń sózinshe, "qoldan jasalyp, erigen qar sýymen tolatyn" Qarasý toǵanynyń uzyndy - 5 shaqyrym, eni - 40-45 metr, tereńdigi ortasha - 1 metr. Toǵan sýy ishýge jaramsyz, turǵyndar ony turmystyq maqsatta - maldy, egindi sýarý úshin paidalanady.
Batys Qazaqstanda balyqtardyń jappai ólýi byltyr jeltoqsannan beri aityla bastady.
Atyraý biligi 2018 jyldyń jeltoqsanynan beri ózen-sýlardy 121 tonna óli balyqtan tazartqanyn aitqan. Ólekseniń 103 tonnasy bekire zaýyttarynan shyqqan.
Atyraý oblystyq politsiia departamenti byltyr balyq qyrylýyna bailanysty "Balyq qorlaryn qorǵaý erejelerin buzý" (336-bap) jáne "Sýdy lastaý, qoqystaý nemese sarqý" (328-bap) baptary boiynsha eki qylmystyq is qozǵaǵan.
