Áleýmettik jelide Batys Qazaqstan oblysy mamandandyrylǵan HQO-da Resei nómirli kólikterdi 102 myń teńgege tirkep jatyr degen habar tarady. Jergilikti organdar bul málimettiń jalǵan ekenin aitady, dep habarlaidy QazAqparat.
«Azamattarǵa arnalǵan úkimet» memlekettik korporatsiiasy BQO boiynsha filialynyń baspasóz qyzmeti málim etkendei, atalǵan aqparat shyndyqqa sáikes kelmeidi.
Fotosýrettegi memlekettik nómir 2022 jyldyń 13 qańtarynda berilgen, biraq kóliktiń ózi 2002 jyly alǵashqy tirkeýden ótken.
«Kólikti qaita óńdeý jáne ózge de kedendik alymdardy qospaǵanda, reseilik nómiri bar avtokólikti qaita tirkeý úshin kóliktiń shyqqan jylyna bailanysty 0,2-den 500 AEK-ke deiin tóleý qajet. Sondyqtan azamattardan avtokólik júrgizýshileri arasynda jalǵan aqparat taratpaý suralady», dep habarlady vedomstvodan.
