Batys Qazaqstan oblysynda 111 282 oqýshysy bar 380 memlekettik mektep jumys isteýde, dep habarlaidy "Ult aqparat".
BQO bilim basqarmasynyń basshysy Aigúl Myńbaevanyń brifingte málim etkenindei, sonyń ishinde shtattyq rejimdegi 248 mektepte jalpy oqýshylar sanynyń 21,7 paiyzy (24 229 shákirt) qamtylǵan.
Óńirde 132 mektepte oqytý qashyqtan uiymdastyrylyp, bularda oqýshylardyń 48,7 paiyzy (54 303) bilim alýda.
- Ata-analardyń nemese balalardyń zańdy ókilderiniń ótinishimen balalar sany 15-ten aspaityn kezekshi synyptardyń jumys jasaýyna ruqsat etildi. Oblysta bastaýysh synyp oqýshylarynyń 67,8 paiyzy (32 750), mektepaldy daiarlyq synyptarynyń 53,3 paiyzy (4 286) kezekshi synyptarmen qamtyldy. Barlyq shtattyq rejimdegi jáne kezekshi synyptary bar mektepterdiń qyzmeti sanitarlyq-epidemiologiialyq talaptardy qatań saqtai otyryp uiymdastyrylýda, - dedi Aigúl Ádilgereiqyzy.
Basqarma basshysynyń sózine qaraǵanda, qashyqtan oqityn 37 311 (65 paiyz) shákirttiń úiinde derbes kompiýterlik qurylǵysy bar. Qalǵandary qaitarymdy negizde mektepter balansyndaǵy kompiýtermen qamtylýda. Kúni búgin olarǵa 9112 kompiýterlik qurylǵy berildi.
QR Úkimeti rezervinen 14970 kompiýterlik qurylǵyny (kompiýterler – 1558, noýtbýkter – 11394, planshetter – 2018) satyp alýǵa qarajat bólinip, bir bóligi, atap aitqanda, 735 planshet 8 qyrkúiek kúni jetkizilip, Jańaqala, Syrym aýdandaryna jáne Oral qalasyna úlestirildi.
Kompiýterleri joq qalǵan oqýshylar Úkimet rezervinen satyp alynatyn kompiýterler esebinen qamtylady.Bul kompiýterler oblysqa 1 qazanǵa deiin jetkiziledi.
Sondai-aq oblys boiynsha qashyqtan oqityn interneti joq 3947 otbasyǵa 3547 qurylǵy taratyldy, qosymsha 400 qurylǵy satyp alynady. Interneti joq oqýshylar mobildi qosymshalaryn paidalanýda. Biylǵy uialy bailanys operatorlary qashyqtan oqytý kezinde oqýshylarǵa múmkindik jasaý úshin arzandatylǵan «Bilim» tarifyn usyndy. Oblys boiynsha bul tarifpen bilim berý uiymdary arqyly 2 myńǵa jýyq oqýshy qamtyldy.
Bilim alýshylardyń jetistigin baqylaý elektrondyq «Kundelik.kz» jýrnalynda júrgiziledi. Elektrondyq jýrnal bolmaǵan jaǵdaida – qaǵaz jýrnalda.
Qashyqtan oqytý kezinde «úi tapsyrmasy» túsinigi ózgerip, oqý tapsyrmalary ǵana qaldy.
Oqý protsesin qashyqtyq formatynda uiymdastyrý úshin ár mektep óz betinshe muǵalimderdiń negizgi suranystaryna sáikes keletin internet-platformany tańdady. Oblys mektepteri Bilimland, Edupage,Daryn onlain bilim platformalaryna qosyldy.
Bilim berý platformasyn usynyp otyrǵan kompaniianyń statistikasyna sáikes bir kúnde beinekonferentsiia arqyly ótkizilgen sabaq sany 14 400 bolyp otyr.
Qashyqtan oqytý kezinde bul platformalardy paidalaný kezinde barlyq saqtyq sharalaryn saqtaý qajet. Iaǵni, ár adam óziniń jeke kirý login paroldaryn qupiia ustaý, kibersaqtyq sharalaryn saqtaý kerek. Oqýshylarǵa login, parolderin ózge adamdarǵa taratpaý jóninde aldyn ala nusqaýlyqtar berildi.
Árine, qashyqtan oqityn oqýshylarǵa ata-analar tarapynan alǵashqy kezde oqý ornyn daiyndaý, úide qolaily jaǵdai jasaýdan bastap úlken qoldaý kerek.
«Jańa oqý jylynda ata-analar, oqýshylar arasynda týyndaityn suraqtarǵa jedel jaýap berý úshin oblystyq bilim basqarmasynyń call-ortalyǵy 1301, 87471127407 telefondary turaqty jumys isteidi. Sall-ortalyǵyna 2020 jyldyń basynan bastap kúni búginge deiin 78 jáne jańa oqý jyly bastalǵan kezden 7(3 jasyryn) telefon qońyraýy tústi. Jalaqy máselesi, eńbek demalysy, muǵalimderdiń sanaty, oqý úrdisin, merekelik sharalardy uiymdastyrý, balabaqshaǵa aqy tóleý, kompiýtermen qamtamasyz etý, qashyqtyqtan oqytýdy uiymdastyrý boiynsha saýaldar boldy. Túsken suraqtarǵa zań aiasynda jáne ýaqtyly jaýap berilip, máseleler sheshildi. Sonymen qatar barlyq aýdandyq (qalalyq) bilim bólimderiniń de call-ortalyqtary da jumys jasaýda. Sanitarlyq-epidemiologiialyq jaǵdaiǵa bailanysty bas sanitarlyq dárigerdiń uiǵarymy negizinde ǵana mektepterdiń oqý formatyn ózgertý týraly sheshimder qabyldanady», dedi A.Myńbaeva.
