Batys Qazaqstan oblysynda koronavirýsqa shaldyǵý kórsetkishiniń tómendegeni baiqalady, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindei, óńirde epidemiologiialyq ahýal salystyrmaly túrde turaqty deýge bolady.
18 tamyz kúni koronavirýs juqpasymen óńirde 28 adam tirkelse, sonyń 20-sy – klinikalyq belgileri joq, 8-i – aýrý belgisi bar naýqastar. 8 naýqastyń bireýi buryn aýyrǵan adammen qarym-qatynasta bolsa, jeteýi ózdiginen meditsinalyq kómekke júgingen.
Keshe anyqtalǵandardyń 16-sy Oral qalasynda, bireýi Bórli aýdanynda, 8-i Báiterekte, ekeýi Terektide, bireýi Qaratóbede tirkelgen.
Sońǵy kezde oblystyń kópshilik aýdanynda indettiń azaia bastaǵany kórinedi. Mysaly, 16 tamyz kúngi málimet boiynsha birde-bir aýdanda koronavirýs tirkelgen joq (24 naýqastyń bári de Oraldan shyqty). 17 tamyzda 22 adamnyń juqtyrǵany anyqtalsa, sonyń 11-i Oralǵa, qalǵan jartysy qalaǵa jaqyn ornalasqan Báiterek aýdanyna tiesili.
Kúni búginge deiin oblysta 6611 adamnyń koronavirýs juqtyrǵany belgili boldy. Sonyń 3247-si aýrý belgisi barlar bolsa, 3364-iniń eshqandai simptomdary joq.
Óńirde 5537 adam jazylyp shyqsa, ókinishke qarai, 86 naýqas kóz jumdy.
1-18 tamyz aralyǵynda oblysta 408 adam syrqattansa, sonyń 74-i nemese 18,1 paiyzy buryn aýyrǵandarmen bailanysta bolǵan. 52 patsientten (12,7 paiyz) profilaktikalyq maqsatta, 16-synan (3,9 paiyz) epidemiologiialyq qadaǵalaý boiynsha synama alynǵan. 266 naýqas (65,1 paiyz) JRVJ belgilerimen dárigerge qaralǵan.
Syrqattanýshylyqtyń ósim kórsetkishi 17 jáne 18 tamyzda 0,2 paiyz boldy.
Departament mamandarynyń aitýynsha, jaǵdai turaqtalyp kele jatyr eken dep arqany keńge salýǵa bolmaidy. Turǵyndardyń betperde kiip, ara qashyqtyqty saqtap, adam kóp jinalatyn jerlerge barmaǵany jón.
