Batys Qazaqstan oblysynda kiik máselesi kúrdeli bolyp otyr, dep habarlaidy QazAqparat.
Májilis depýtaty Amanjan Jamalovtyń Feisbýktegi paraqshasynda BQO-da kiikter sanynyń kúrt ósýine bailanysty jaiylymdar men shabyndyq alqaptaryna ziian kelip jatqany jóninde oblys fermerlerinen kóptegen ótinishter kelip túskeni týraly jazdy.
Kiikterdiń sanyn retteý týraly máseleni sheshý úshin Májilis depýtaty Ekologiia, geologiia jáne tabiǵi resýrstar ministri S.A. Brekeshevke hat joldaǵan.
«Keshe osy másele boiynsha Ekologiia ministri Serikqali Amanǵaliuly Brekeshevpen jeke sóilestim.
Másele aitarlyqtai kúrdeli. Ony sheshý úshin keshendi kózqaras qajet. Aýyl sharýashylyǵy ministrligine kiikti atý úshin jaǵdai jasaý qajet, al bul ózderine tiisti kiim-keshek, tehnika, oq-dáriler jáne t.b. qajet bolatyn arnaiy komandalar qurýdy talap etedi. Budan basqa, Aýyl sharýashylyǵy ministrligi etti, teri men múiizdi odan ári qaita óńdeý máselesin sheshýi qajet.
Búgingi tańda máseleni eki kezeńde sheshý qaralyp jatyr. Birinshi kezeń – 15 shildeden keiin (jazǵy atý) jáne ekinshi kezeń – kúzgi atý.
Taǵy da máseleniń edáýir kúrdeli ekenin atap ótkim keledi. Budan basqa, barlyq is-sharalardy iske asyrý úshin shamamen 1 mlrd teńge talap etiledi. Qarajat bólý máselesimen ainalysamyn.
Aldaǵy ýaqytta Ekologiia, geologiia jáne tabiǵi resýrstar ministrliginiń hatyma bergen egjei-tegjeili jaýabynan habardar etetin bolamyn», dep jazdy Jamalov.
