Batys Qazaqstan oblysynda 505 ýchaskelik sailaý komissiiasy jumys isteitin bolady, dep habarlaidy "Ult aqparat".
Oblystyq sailaý komissiiasynyń tóraǵasy Ǵaisa Qapaqovtyń málim etkenindei, sonyń 110-y Oral qalasynda ornalasqan.
Barlyq sailaý ýchaskeleri 10 jeltoqsannan bastap jumysqa kirisedi. Al 14 aýmaqtyq (oblystyq, qalalyq, aýdandyq) sailaý komissiiasy eki aidan beri óz qyzmetterin atqarýda.
Ǵaisa Hamidollaulynyń sózine qaraǵanda, aldyn ala esep boiynsha oblysta 458 myń sailaýshy bar. Sailaýshylar tizimi áli de naqtylanatyn bolady.
Sailaý komissiialaryna jańadan 500 adam tartyldy, olardyń báriniń de sailaý ótkizýde jumys tájiribeleri bar. Múshe bolǵan 3259 adamnyń 98-i aýmaqtyq, 3161-i ýchaskelik sailaý komissiialarynyń quramyna engen.
10 jeltoqsannan bastap úgit-nasihat jumystary bastalady. Máslihat depýtattaryn sailaý alǵash ret partiialyq tizim boiynsha ótedi. Qazirgi tańda «Nur Otan» – 350, «Aýyl» – 41, «Aq jol» – 35, «Adal» partiiasy 29 úmitker usynyp otyr.
Kóp uzamai partiialar ókilderi sailaýshylarmen kezdesýlerin ótkizedi. Al qańtar aiynyń basynda oblystyq telearnada jariia pikirsaiys uiymdastyrylady.
«Basty maqsat – aldaǵy sailaýdy barlyq sanitarlyq talaptarǵa sai ótkizý. Bul sailaýdyń ereksheligi de sol, birinshi ret indet jaǵdaiynda ótkeli tur. Sondyqtan sailaý komissiialarynda barlyq saqtyq sharalary qolǵa alynyp, ár azamattyń óziniń konstitýtsiialyq quqyǵyn paidalanyp, daýys berýine tolyq múmkindik jasaýymyz qajet», dedi Qapaqov.
