Batys Qazaqstan oblysynda 100-den astam pedagog koronavirýsqa qarsy ekpe aldy, dep habarlaidy "Ult aqparat".
BQO densaýlyq saqtaý basqarmasynyń basshysy mindetin atqarýshy Arman Qalibekovtiń óńirlik kommýnikatsiialar qyzmeti alańynda málim etkenindei, óńirge 4 naýryz kúni 6500 doza mólsherinde Gam-KOVID-Vak (Sputnik V) vaktsinasy jetkizilgen (I komponent – 3250 doza, II komponent – 3250 doza) bolatyn.
Arman Talǵatulynyń sózine qaraǵanda, kúni búgin osy lekten (3250 doza) 560 adam ekpe aldy. Sonyń ishinde 102-si – pedagogtar, jeteýi – quqyq qorǵaý organdarynyń ókilderi.
Vaktsinatsiia keste boiynsha júrgizilýde. Birinshi kezekte aldyńǵy topqa ilikpei qalǵan, indet juqtyrý qaýpi joǵary medikter, sodan keiin muǵalimder men kúshtik qurylymdar qyzmetkerleri egilýde.
Oǵan qosa QR bas memlekettik sanitarlyq dárigeriniń 2021 jylǵy 16 aqpandaǵy qaýlysyna sáikes ózgerister engizilip, 65 jastan asqan adamdarǵa vaktsina jasaýǵa ruqsat etildi.
Bastapqy kezeńde 1 myń meditsina qyzmetkerine vaktsinanyń I jáne II komponentteri tolyqtai egilgen bolatyn.
Oblysta koronavirýs juqtyrý qaýpi seiilgen joq. Osy kezge deiin barlyǵy 13667 adam indet juqtyrsa, sonyń 11308-i nemese 82,7 paiyzy jazylyp shyqty. 216 adam indetten kóz jumdy.
«Qazirgi tańda 195 tósektik 4 karantindik statsionarda 108 naýqas jatyr. Al 591 tósektik 7 infektsiialyq statsionarda 278 adam emdelýde. Jansaqtaý bólimshesindegi 17 naýqastyń úsheýi – 30 ben 60, 10-y 60-80 jas aralyǵyndaǵylar bolsa, tórteýi – seksennen asqandar. 14 naýqastyń 12-si qosymsha júrek-qan tamyrlary aýrýlary, ekeýi qant diabetine shaldyqqan. Kúni búgin invazivti jasandy tynys alý apparatyna 1, invazivti emes apparatqa 10, ottegi kontsentratoryna 4, ortalyqtandyrylǵan ottegi kózine 67 naýqas qosylǵan», dedi Qalibekov.
